بالی وڈ کے مشہور اداکار عامر خان اور فلم ساز کرن راؤ نے ایک مشترکہ بیان میں شادی کے 15 سال بعد طلاق کا اعلان کردیا ہے۔

میڈیا رپورٹس کے مطابق عامر خان اور انکی اہلیہ کی جانب سے انکی طلاق کا اعلان باقاعدہ طور پر آج کیا گیا ہے۔

اپنی طلاق کے حوالے سے عامر اور کرن نے ایک خوبصورت پیغام بھی لکھا ہے جس میں طلاق کے اعلان سمیت گزارے جانے والے سالوں کو خوبصورت انداز میں پیش کیا گیا ہے۔

پیغام میں لکھا گیا ہے کہ ،’ ان 15 خوبصورت سالوں میں ہم نے زندگی بھر کے تجربات، خوشی کا اشتراک کیا ہے اور ہمارے تعلقات اعتماد، احترام اور محبت میں مزید بڑھ ے ہیں لیکن اب ہم اپنی زندگی کا ایک نیا باب شروع کرنا چاہیں گے، اس لئے اب شوہر اور بیوی کے طور پر نہیں بلکہ شریک والدین اور خاندان کے طور پر ایک دوسرے کا ساتھ نبھائیں گے۔‘

خیال رہے کہ عامر اور کرن کی پہلی ملاقات لگان کی شوٹنگ کے دوران ہوئی تھی جس میں انہوں نے مرکزی کردار ادا کیا تھا اور وہ اسسٹنٹ ڈائریکٹر تھیں۔

وہ 28 دسمبر 2005 کو شادی کے بندھن میں بندھ گئے۔عامر نے اس سے قبل رینا دتہ سے شادی کی تھی اور ان کے ساتھ دو بچے جنید خان اور ایرا خان ہیں۔