پاکستان کے معروف نوجوان اداکار منیب بٹ نے انکشاف کیا ہے کہ احسن محسن اکرام اُن کی نقل کرتے ہیں۔

حال ہی میں منیب بٹ نے ایک نجی ٹی وی کے شو میں شرکت کی، شو کے دوران منیب نے منال خان کے شوہر احسن محسن سے متعلق بات کرتے ہوئے کہا کہ میں نے شادی کے دوران فوٹو شوٹ کرواتے ہوئے ایمن کا چہرہ صاف کر دیا تھا جس پر ایمن کا کہنا تھا کہ تم احسن کی نقل کر رہے ہو۔

منیب بٹ نے بتایا کہ اس سے ایک دن قبل ہی منال خان کا چہرہ صاف کرتے ہوئے احسن کا ایک کلپ وائرل ہوا تھا۔

انہوں نے کہا کہ احسن کا وائرل کلپ ایمن نے دیکھا تھا جبکہ اُنہیں اس سے متعلق علم نہیں تھا، جب ایمن خان نے بتایا تو اُنہیں معلوم ہوا کہ ایک دن قبل احسن اور منال کی بھی اسی پوز میں تصویریں بن چکی ہیں۔

منیب بٹ نے ہنستے ہوئے کہا کہ اُنہوں نے ایمن خان کو بتایا کہ وہ احسن محسن کے کلپ کے بارے میں نہیں جانتے، وہ احسن کی نقل نہیں کرتے بلکہ احسن اُن کی نقل کرتا ہے۔

واضح رہے کہ گزشتہ دنوں منال خان کی شادی سوشل میڈیا سائٹس پر خوب وائرل رہی، شادی کی تصویروں اور ویڈیوز میں دیکھا جا سکتا ہے کہ منال خان کی جڑواں بہن ایمن خان اور اُن کے شوہر منیب بٹ نے بھی یہ شادی خوب انجوائے کی ۔