پاکستان شوبز انڈسٹری کی پسندیدہ آن اسکرین جوڑی اداکار فواد خان اور صنم سعید کے بارے میں یہ قیاس آرائیاں کی جارہی ہیں کہ یہ دونوں ایک بار پھر سے اسکرین پر ساتھ نظر آنے والے ہیں۔

سوشل میڈیا پر یہ خبریں گردش کررہی ہیں کہ یہ جوڑی اب بھارتی اسٹریمنگ سروس زی فائیو کی ویب سیریز میں ایک ساتھ نظر آئے گی۔

یہ خبریں سوشل میڈیا پر اس وقت گردش کرنے لگیں جب بھارتی فلم ساز وہدایتکار شیلجا کیجریوال نے اپنی انسٹاگرام پوسٹ پر پاکستانی اداکار فواد خان کی تصویر شیئر کی ۔

انہوں نے فواد خان کی تصویر شیئر کرتے ہوئے لکھا کہ آخر کار زندگی کامیاب ہوگئی ۔

شیلجا کیجریوال کی اس پوسٹ پر کمنٹ کرتے ہوئے ایک مداح نے پوچھا کہ کیا صنم اور فواد اس پراجیکٹ پر ساتھ کام کررہے ہیں ؟

جس کے جواب میں انہوں نے ایک ایموجی کا استعمال کرتے ہوئے مداح کو خاموش رہنے کو کہا۔

واضح رہے کہ مداح اپنی پسندیدہ جوڑی کو بین الاقوامی ویب سیریز میں ساتھ دیکھنے کے لئے بہت پرجوش ہیں۔