پاکستان شوبز انڈسٹری کی معروف اداکارہ حبا بخاری نے بھی محسنِ پاکستان ڈاکٹر عبدالقدیر خان کے انتقال پر افسوس کا اظہارکیا ہے۔

اداکارہ نے فوٹو اینڈ ویڈیو شیئرنگ ایپ انسٹاگرام پر ڈاکٹر عبدالقدیر خان کی ایک یادگار تصویر شیئر کرتے ہوئے لکھا کہ عمر شریف کے بعد ہم نے ایک اور قیمتی انسان کھو دیا ہے۔

حبا بخاری نے لکھا کہ پاکستان کی ایٹمی ٹیکنالوجی کے باپ ڈاکٹر عبدالقدیر خان 85 سال کی عمر میں اسلام آباد میں انتقال کر گئے۔

انہوں نے محسنِ پاکستان کے لئے دعائے مغفرت کرتے ہوئے لکھا کہ اللّہ سر قدیر خان کو جنت میں اعلیٰ مقام عطا فرمائے۔

حبا بخاری نے مداحوں سے اپیل کرتے ہوئے لکھا کہ براہ کرم ، مرحوم کی روح کے لئے دُعا کریں۔

واضح رہے کہ محسنِ پاکستان، ایٹمی سائنسدان ڈاکٹر عبد القدیر خان آج صبح رضائے الٰہی سے انتقال کر گئے۔

ذرائع نے بتایا کہ طبیعت بہت زیادہ خراب ہونے کی وجہ سے ڈاکٹر عبدالقدیر خان کو صبح 6 بجے کے آر ایل اسپتال لایا گیا تھا۔

ذرائع کے مطابق ڈاکٹر عبدالقدیر خان کی کچھ عرصے سے طبیعت ناساز تھی اور ان کا انتقال صبح 7 بج کر 4 منٹ پر ہوا۔

اسپتال ذرائع نے بتایا کہ ڈاکٹر عبدالقدیر خان کچھ عرصے قبل کورونا وائرس سے متاثر ہوئے تھے۔

واضح رہے کہ ڈاکٹر عبدالقدیر خان 1936ء میں بھوپال میں پیدا ہوئے، وہ اہلِ خانہ کے ہمراہ 1947ء میں ہجرت کر کے پاکستان آئے تھے۔

انہوں نے انجینئرنگ کی ڈگری 1967ء میں نیدر لینڈز کی ایک یونیورسٹی سے حاصل کی اور بیلجیئم کی ایک یونیورسٹی سے میٹلرجیکل انجینئرنگ میں ڈاکٹریٹ کی ڈگری لی، بعد میں ایمسٹرڈیم میں فزیکل ڈائنا مکس ریسرچ لیبارٹری جوائن کی۔