پاکستانی گلوکار علی عظمت کے حالیہ بیان پر اداکار احمد علی بٹ کا ردعمل سامنے آگیا۔

احمد نے اپنی ایک انسٹاگرام پوسٹ میں کہا کہ میری مرحومہ نانی میڈم نور جہاں برصغیر کی سب سے بڑی فنکارہ ہیں اور یہ ایک حقیقت ہے۔

انہوں نے کہا کہ میں نے علی عظمت کو بطور فنکار اور ایک دوست کے طور پر ہمیشہ عزت دی ہے وہ پاکستان کے بڑے راک اسٹارز میں سے ایک ہیں لیکن نورجہاں کے بارے میں ان کا حالیہ تبصرہ ٹھیک نہیں ہے کیونکہ یہ تبصرہ ایک ایسی شخصیت کے لئے کیا گیا ہے جو اب اس دنیا میں بھی نہیں ہیں۔

اداکار نے کہا کہ  مجھے یقین ہے علی عظمت اس چیز سے واقف ہیں کہ  نور جہاں کی کتنی بڑی میراث ہے اور ایک ہزار راک بینڈ مل کر بھی ان جیسا ایک گانا نہیں بنا سکتے۔

 احمد علی بٹ نے یہ بھی کہا کہ میں یہاں کسی کے خلاف نہیں جارہا بس میرا یہ ماننا ہے کہ علی عظمت بھی ایک فنکار ہیں اور وہ  بہت اچھی طرح جانتے ہیں کہ عزت تب آتی ہے جب آپ عزت دیتے ہیں ۔

احمد علی نے کہا کہ جہاں تک میلوڈی کوئین کی بات ہے تو گائے گی دنیا گیت میرے ہمیشہ یادگار رہے گا۔