بھارتی اداکار شاہ رخ خان نے ایک بار پھر اپنی شوٹنگ اور دیگر مصروفیات کو معمول کے مطابق انجام دینے کا فیصلہ کرلیا ہے۔

رپورٹس میں بتایا گیا ہے کہ اداکار رواں سال ماہ دسمبر سے اپنی فلموں کی شوٹنگ کا دوبارہ آغاز کرنے کا ارادہ رکھتے ہیں لیکن اس کے لئے انہوں نے چند شرائط بھی رکھی ہیں۔

رپورٹس میں بتایا جارہا ہے کہ منشیات کیس میں آریان خان کی ضمانت کے بعد شاہ رخ خان پورا وقت اپنی فیملی کے ساتھ گزارتے ہیں اور اپنے بیٹے پر کڑی نظر بھی رکھتے ہیں۔

لیکن آریان کی رہائی کے بعد یہ خاندان آہستہ  آہستہ اپنی زندگی کو معمول پر لانے کی کوشش کر رہا ہے۔

اسی کوششوں کے تحت شاہ رخ خان نے شوٹنگ کے لئے اندرون یا بیرون ملک اُن کے دوروں کو مختصر سے مختصر کرنے کی شرط رکھی ہے۔

ذرائع نے مزید دعویٰ کیا کہ شاہ رخ خان حالیہ واقعے کے بعد آریان اور ان کے خاندان کے لئے بہت زیادہ محتاط ہوگئے ہیں لہٰذا اُنہوں نے شوٹنگ کے دوران بھی اپنے اہلخانہ کو اپنے ساتھ رکھنے کے بارے میں سوچا ہے۔

واضح رہے کہ گزشتہ ماہ 2 اکتوبر کو نارکوٹکس کنٹرول بیورو (این سی بی) کی جانب ممبئی کروز شِپ پر چھاپہ مارا گیا جہاں بالی ووڈ کنگ شاہ رخ خان کے بڑے بیٹے آریان خان کو اُن کے دوستوں سمیت منشیات استعمال کرنے کے الزام میں حراست لیا گیا تھا۔