بالی ووڈ کی متنازع اداکارہ کنگنا رناوت نے کہا ہے کہ میں نے دولت سے زیادہ دشمن کمائے ہیں۔

گزشتہ روز کنگنا رناوت کو نئی دہلی میں پدم شری ایوارڈ سے نوازا گیا جس کے بعد انہوں نے اپنے مداحوں کے لئے انسٹاگرام پر ایک ویڈیو پیغام شیئر کیا۔

کنگنا رناوت نے کہا کہ ان کو بااصول شہری ہونے کے باعث پدم شری ایوارڈ ملا ہے جس نے بہت سارے لوگوں کے منہ بند کردیے ہیں۔

بالی ووڈ کوئین نے کہا کہ میں بطور اداکارہ اپنے کام کی وجہ سے کئی ایوارڈز حاصل کرچکی ہوں لیکن پدم شری اس بات کا اظہار ہے کہ ایک ملک اپنے مثالی شہری کو کیسے اہمیت دیتا ہے۔

کنگنا رناوت نے کہا کہ میں نے فیرنس پروڈکٹس، آئٹم نمبرز، مشہور اداکاروں اور بڑے پروڈکشن ہاؤسز کے ساتھ فلم کرنے سے پرہیز کیا اور یہی وجہ ہے کہ میں نے پیسے سے زیادہ دشمن کمائے ہیں۔

انہوں نے کہا کہ جب نوعمری میں اپنے کیریئر کا آغاز کیا تو مجھے شروع کے 8، 10 سالوں میں کامیابی نہیں ملی لیکن جب کامیابی ملی تو اس سے لطف اندوز ہونے کے بجائے دوسروں کے مسائل حل کرنے میں لگ گئی۔