سابق مس انڈیا اور بالی ووڈ کی سپر ہِٹ فلموں کی اداکارہ سشمیتا سین نے سرجری کروانے کی خبر دے کر مداحوں کو پریشان کر دیا۔

اداکارہ نے گزشتہ روز 19 نومبر کو اپنی 46 ویں سالگرہ منائی ہے۔

سشمیتا سین نے انسٹاگرام پر اپنی ایک تصویر شیئر کرتے ہوئے لکھا کہ میں اپنے تمام چاہنے والوں کا دل سے شکریہ ادا کرتی ہوں جنہوں نے سالگرہ کی مبارکباد پیش کی اور نیک تمناؤں کا اظہار کیا۔

انہوں نے لکھا کہ مجھے ایسا محسوس ہو رہا ہے جیسے میں نے دوسری بار جنم لیا ہو اور اسے میں الفاظ میں بیان نہیں کر سکتی۔

سشمیتا سین نے لکھا کہ میں آپ سب کو ایک راز کی بات بتانا چاہتی ہوں، آریا 2 کی شوٹنگ مکمل کرنے کے بعد میں نے اپنی صحت کو بہتر کرنے پر توجہ دی۔

اداکارہ نے بتایا کہ 16 نومبر کو میری ایک کامیاب سرجری ہوئی ہے اور اب ہر گزرتے دن کے ساتھ میں بہتر سے بہتر محسوس کر رہی ہوں۔

سرجری کا سن کر کمنٹ باکس میں مداحوں کے پیغامات کی بارش شروع ہوگئی ،مداحوں نے جہاں انہیں دعائیں دیں وہیں سرجری سے متعلق تفصیلات فراہم کرنے کی بھی درخواست کی۔

مداحوں کے سوالات کے بعد سشمیتا سین نے انسٹاگرام پر ایک ویڈیو پوسٹ کی۔

انہوں نے بتایا کہ میری سرجری کا سن کر آپ لوگ پریشان ہوگئے، میں بالکل خیریت سے ہوں اگر مجھے کچھ ہوتا تو میں آپ لوگوں کو ضرور اطلاع دیتی۔

سشمیتا سین نے کہا کہ آپ لوگوں کو پریشان ہونے کی ضرورت نہیں، میں صحت یاب ہو رہی ہوں لیکن اس میں تھوڑا وقت لگے گا مگر اداکارہ کی جانب سے سرجری کی کوئی تفصیل مداحوں کے ساتھ شیئر نہیں کی گئی۔