بھارت کی معروف اداکارہ تاپسی پنو نے بھارتی فلم انڈسٹری کے ایک راز سے پردہ اٹھاتے ہوئے صنفی امتیاز کی طرف اشارہ کیا ہے۔

اس حوالے سے جاری میڈیا رپورٹس کے مطابق اداکارہ و ماڈل نے اپنے ایک انٹرویو میں بالی وڈ میں اداکاراؤں سے امتیازی سلوک کے حوالے سے بتایا ہے۔

اداکارہ و ماڈل تاپسی نے بتایا ہے کہ ہمارے معاشرے میں مردوں کو اس بات کی تربیت دی جاتی ہے کہ کسی فلم میں اگر کردار   صرف 10 فیصد ہو تو اسے کرنے سے انکار کردیا جائے جبکہ مرد کے مرکزی کردار کے ساتھ ایک سپر اسٹار اداکارہ کو ہی کاسٹ کیا جاتا ہے۔

 تاپسی پنو نے اپنے حوالے سے بتایا ہے کہ جب بھی میں اپنے پروڈیوسر کے ساتھ اپنی فلم کے لیے شارٹ لسٹ ہوئے مرد اداکاروں کی فہرست دیکھتی ہوں تو وہ ایسے اداکار ہوتے ہیں جنہوں نے صرف ایک یا دو فلمیں کی ہوتی ہیں۔

انہوں نے بتایا کہ وہ بھی ان کے ساتھ فلم میں کردار ادا کرنا نہیں چاہتے کیونکہ ہمارے نظام نے انہیں اس بات کی تربیت دی ہوئی ہوتی ہے کہ اگر فلم میں ان کا کردار صرف 10 فیصد ہو تو وہ یہ فلم نہ کریں۔

خیال رہے کہ بالی ووڈ اداکارہ ’ تاپسی پنوں ‘ نے 2010 میں تامل فلم ’جھمندی نادام‘ سے انڈسٹری میں قدم رکھا تھا اور دیکھتے ہی دیکھتے شہرت کی بلندیوں کو چھو لیا ہے۔

اداکارہ نے اب تک کئی فلموں سمیت دیگر پلیٹ فارمز پر کام کیاہے جس کے باعث وہ کئی ایوارڈ بھی حاصل کر چکی ہیں۔

تاپسی ایونٹ مینجمنٹ میں بھی بے حد دلچسپی رکھتی ہیں اور ایک ایونٹ مینجمنٹ کمپنی بھی چلاتی ہیں جس کا نام ” دی ویڈنگ فیکٹری “ ہے ، جو کہ شادیوں کی تقریبا ت کا انعقاد کرتی ہے ،اداکارہ یہ کمپنی اپنی پارٹنر فرح اور بہن شگن پنو کے ہمراہ چلاتی ہیں ۔