مارول سیریز کی اسپائیڈر مین فار فرام ہوم میں اسپائیڈر مین کی حجابی کالاس میٹ کا کردار ادا کرنے والی پاکستانی ماڈل و اداکارہ زوہا رحمان اب امریکا کی سائنس فکشن ٹیلی ویژن سیریز فاؤنڈیشن میں نظر آئیں گی۔

زوہا رحمان کا بین الاقوامی سطح پر ملنے والی اپنی اس کامیابی پر کہنا ہے کہ وہ فاؤنڈیشن پبلشرز کی کتابوں کی بہت بڑی پرستار ہیں جس کی وجہ سے سیریز کا حصہ بننا ان کے لئے بہت بڑا اعزاز ہے۔

اداکارہ اس سیریز میں اونیل کا کردار ادا کریں گی جو کہ ایک سپاہی کا کردار ہے۔

انہوں نے بتایا کہ یہ کردار بہت دلچسپ ہے انہیں ہر وہ چیز پسند ہے جس کا سائنس فکشن سے تعلق ہو لہٰذا وہ اس شو کے بارے میں بہت پرجوش ہیں۔

واضح رہے کہ اس سیریز کی کہانی مقبول پبلشر آئزک ایزیمووکی کتابوں کی سیریز فاؤنڈیشن سے اخذ کی گئی ہے۔

اس سیریز کو ڈیوڈ ایس گوئیر اور جوش فریڈمین نے تخلیق کیا ہے جسے 24 ستمبر کو ایپل پلس پر ریلیز کیا گیا ہے۔