امریکی اداکارہ لنڈسے لوہان نے اپنے مسلمان دوست بدر شمس کو جیون ساتھی چن کر مداحوں کو حیرت میں مبتلا کردیا۔

امریکی اداکارہ لنڈسے لوہان کی 2017 میں قرآن پاک پڑھنے کی ویڈیو وائرل ہونے کے بعد انہیں متعدد بار حجاب میں بھی دیکھا گیا جس سے یہ خبریں سامنے آئی تھیں کہ انہوں نے اسلام قبول کرلیا ہے تاہم ہالی ووڈ اداکارہ نے اس خبر کی تردید کردی تھی۔

بعد ازاں ایک پروگرام میں شرکت کے دوران اداکارہ نے وضاحت کرتے ہوئے بتایا کہ وہ اسلامی تعلیمات سے متاثر ہیں اور قرآن پاک پڑھتے ہوئے سکون ملتا ہے تاہم انہوں نے اسلام قبول نہیں کیا۔

لنڈسے لوہان نے یہ بھی کہا کہ وہ نہ صرف قرآن پاک پڑھتی ہیں بلکہ اپنے موبائل پر تلاوت سنتی بھی ہیں جس سے انہیں بہت زیادہ سکون ملتا ہے جب کہ انہوں نے روزہ رکھنے کی بھی کوشش کی۔

گزشتہ روز امریکی اداکارہ نے انسٹاگرام اکاؤنٹ پر اپنے قریبی مسلمان دوست بدر شمس کے ساتھ خوشگوار موڈ میں تصاویر شیئر کیں اور کیپشن میں لکھا ’’میرا پیار، میری ، زندگی ، میری فیملی اور میرا مستقبل، بدر شمس۔

اداکارہ نے کیپشن میں انگوٹھی کی ایموجی بھی شیئر کی جب کہ تصاویر میں بھی انہوں نے ہیرے کی انگوٹھی پہن رکھی ہے جس سے یہی تاثر مل رہا ہے کہ اداکارہ نے اپنے دوست بدر شمس سے منگنی کرلی ہے۔

واضح رہے امریکی اداکارہ لنڈسے لوہان اور دبئی کے بزنس مین بدرشمس کی پہلی ملاقات ایک میوزک کنسرٹ میں ہوئی تھی اور وہ گزشتہ دو سال سے ایک ساتھ تھے اور اب انہوں نے ہمیشہ کے لیے ساتھ رہنے کا فیصلہ کرلیا ہے۔