معروف بالی ووڈ اداکارہ رانی مکھرجی کی پانچ سالہ بیٹی ادیرا اپنی والدہ کی ڈریس ڈیزائنر بن گئی۔

رانی مکھرجی نے اپنے ایک انٹرویو میں یہ انکشاف کیا کہ ان کی فلم بنٹی اور ببلی 2 میں جو ملبوسات انہوں نے پہنے ہیں وہ ان کی بیٹی ادیرا کا انتخاب ہیں۔

انہوں نے بتایا کہ انہیں یاد ہے کہ وہ لندن میں تھیں جب ادیرا ان کے ساتھ آئی اور اصرار کیا کہ وہ چیزوں کے انتخاب میں ان کی مدد کرنا چاہتی ہے اور اس نے اکیلے ہی ہر چیز کا انتخاب کیا۔

اداکارہ نے بتایا کہ ان کی بیٹی ادیرا نا صرف فلم کی کاسٹ اور عملے کے ساتھ ابوظہبی اور لندن گئی تھی بلکہ اس نے رانی مکھرجی کی فلم کی عکس بندی کے لئے کپڑوں کا انتخاب کرنے میں بھی مدد کی۔

رانی مکھرجی کا کہنا تھا کہ جب وہ ابوظہبی میں شوٹنگ کر رہی تھیں تو ادیرا نے بہت سے ملبوسات اور جیولری کے انتخاب میں ان کی مدد کی تھی۔

واضح رہے کہ ادیرا اداکارہ رانی مکھرجی اور یش راج فلمز کے چیئر پرسن آدتیہ چوپڑا کی بیٹی ہیں۔

رانی مکھرجی نے اپریل 2014 میں اٹلی میں ایک نجی تقریب میں آدتیہ کے ساتھ شادی کی تھی اور شادی کے ایک سال بعد اس جوڑی کے ہاں ان کی بیٹی ادیرا کی پیدائش ہوئی تھی۔