بھارتی اداکارہ پریانکا چوپڑا کے شوہر اور امریکی گلوکار نِک جونس نے یہ انکشاف کیا ہے کہ وہ 13 سال کی عُمر میں ذیابطیس کا شکار ہوئے تھے۔

بھارتی میڈیا رپورٹس کے مطابق نِک جونس نے 13 سال کی عمر میں ٹائپ 1 ذیابیطس کی تشخیص ہونے کے بارے میں سوشل میڈیا پر ایک طویل نوٹ لکھا۔

انہوں نے کہا کہ میں 13 سال کا تھا اور اپنے بھائیوں کے ساتھ کھیل رہا تھا تو میری طبیعت عجیب سی محسوس ہوئی جس کے بعد میں اپنے والدین کے پاس گیا اور انہیں بتایا کہ مجھے ڈاکٹر کے پاس لے جائیں ۔

امریکی گلوکار نے کہا کہ طبی معائنے کے بعد میرے ماہر امراض نے مجھے بتایا کہ مجھے ٹائپ 1 ذیابیطس ہے اور میں یہ سُن کر خوفزدہ ہوگیا تھا۔

نِک جونس نے لکھا کہ میں اس بیماری کو شکست دینے کے لئے پُرعزم تھا بالکل اسی طرح جیسے میں ہمیشہ رہا ہوں۔

انہوں نے بتایا کہ میں نے خود کو سُست نہیں ہونے دیا کیونکہ میرے پاس ایک ناقابل یقین سپورٹ سسٹم تھا۔

واضح رہے کہ پریانکا چوپڑا اور نِک جونس نے سال 2018 میں یکم دسمبر کو ہندواور 2 دسمبر کو عیسائی طرزِ عمل کی شادی کی تھی۔