پاکستانی اداکار ارسلان اسد بٹ اور دُنیا بھر میں مقبول ہونے والی تُرک سیریز ’ارطغرل غازی‘ میں حلیمہ سلطان کا کردار نبھانے والی اداکارہ اسرا بیلگیچ نئے پراجیکٹ میں ایک ساتھ دکھائی دیں گے۔

ارسلان اسد بٹ نے فوٹو اینڈ ویڈیو شئیرنگ ایپ انسٹاگرام پر ایک تصویر پوسٹ کی ہے۔

اداکار کی جانب سے شئیر کی گئی تصویر میں دیکھا جاسکتا ہے کہ ارسلان بٹ کے ہمراہ تُرک اداکارہ اسرا بیلگیچ بھی موجود ہیں۔

ارسلان بٹ نے اپنے مداحوں کو خوشخبری سُنائی کہ وہ جلد اسرا بیلگیچ کے ہمراہ ایک نئے پراجیکٹ میں نظر آئیں گے۔

شیئر کی گئی پوسٹ میں انہوں نے کہا کہ اسرا بیلگیچ کے ہمراہ کام کرنا میرے لئے ایک اعزاز ہے۔

اداکار نے کہا کہ اسرا بیلگیچ واقعی بہت ہی شائستہ اور باصلاحیت لڑکی ہیں، میں نے سیٹ پر اسرا کی صحبت سے لطف اٹھایا۔

ارسلان بٹ نے اپنی خواہش کا اظہار کرتے ہوئے کہا کہ ہم اسرا کو پاکستان میں دیکھنے کے منتظر ہیں۔

واضح رہے کہ ارسلان اسد بٹ کی جانب سے اس نئے پراجیکٹ کے حوالے سے مزید تفصیلات نہیں بتائیں گئیں ۔

ارسلان بٹ ایک پاکستانی ماڈل اور اداکار ہیں ،وہ شاندار اداکاری کی مہارت کے ساتھ ایک دلکش شخصیت کے مالک بھی ہیں۔

 انہوں نے اپنے کیریئر کا آغاز 2012 میں ماڈلنگ سے کیا جبکہ اداکاری کیرئیر کا آغاز 2014 میں ڈرامہ ڈھول بجنے لگا سے کیا اور 2018 میں سپر ہٹ فلم پرواز ہے جنون میں بڑے پردے پر پرفارم کیا۔