پاکستان کی معروف اداکارہ ہانیہ عامر اسپائیڈر مین بن گئیں۔

ہانیہ عامر نے اپنے انسٹا گرام اکاؤنٹ پر دو تصویریں اور ایک ویڈیو شیئر کی ہے جس میں وہ اسپائڈر مین کا روپ دھارے ہوئے نظر آرہی ہیں۔

ہانیہ عامر کی یہ نئی تصویریں اور ویڈیو سوشل میڈیا فین پیجز پر بھی خوب وائرل ہو رہی ہیں جسے دیکھ کر مداحوں کو ہانیہ عامر کو پہچاننے میں مشکل کا سامنا ہے ۔

دوسری جانب ہانیہ عامر کی اس پوسٹ پر بھارتی معروف کامیڈین و اداکارہ ڈولی سنگھ کی جانب سے بھی اُن کے اس انداز کی تعریف کی گئی ہے۔

واضح رہے کہ ہالی ووڈ کی بالک بسٹر فلم اسپائیڈر مین سیریز فلم اسپائیڈر مین: نو وے ہوم‘ نے پاکستان میں بھی مقبولیت حاصل کرلی ہے۔

ملک بھر میں اس فلم کے ریلیز کے پہلے 03 روز تک ٹکٹ ملنا ناممکن تھا جبکہ بہت سے لوگوں نے اس فلم کی ایڈوانس بکنگ بھی کروائی تھی۔

اس فلم نے پاکستان بھر میں  ریلیز کے پہلے ہی دن  دو اعشاریہ دو کروڑ روپے کا بزنس کیا تھا جو کہ پاکستان میں ریلیز ہونے والی کسی بھی ہالی وڈ فلم کی چھٹی بہترین اوپننگ ہے۔

اس حوالے سے پاکستانی ہدایتکار کا کہنا تھا کہ اسپائیڈر مین: نو وے ہوم‘ سے پاکستانی سنیماؤں کو ایک نئی زندگی ملی ہے کیونکہ کورونا کے دنوں کے بعد لوگوں کو گھروں سے نکالنا بہت مشکل مرحلہ ثابت ہورہا ہے۔

خیال رہے کہ اس سے قبل پاکستان میں ریلیز ہونے والی ہالی وڈ کی فلموں کی فہرست میں ‘ایونجرز اینڈ گیم’ چار اعشاریہ چھ کروڑ روپے کے ساتھ پہلے، ‘فاسٹ ایٹ’، ‘فیوریس سیون’، ‘ہوبز اینڈ شا’ اور ‘ایونجرز انفنیٹی وار ‘بالترتیب دوسرے سے پانچویں نمبر پر موجود ہیں۔