گزشتہ سال شوبز چھوڑ کر مذہب کی طرف راغب ہونے والی سابقہ بالی ووڈ اداکارہ ثناء خان اپنے شوہر مفتی انس کے ہمراہ عُمرے کی سعادت حاصل کرنے کے لئے سعودی عرب روانہ ہوگئیں ہیں۔

ثناء خان نے فوٹو اینڈ ویڈیو شیئرنگ ایپ انسٹاگرام پر اپنے شوہر کے ہمراہ ایک تصویر شیئر کی ہے۔

اس تصویر کو شئیر کرتے ہوئے انہوں نے بتایا کہ وہ شوہر کے ساتھ عُمرے کی سعادت حاصل کرنے جارہی ہیں۔

ثناء خان نے لکھا کہ یہ نکاح کے بعد ہمارا سب سے خوبصورت سفر ہے ،کیا حسین سماں ہوگا، کیا حسین گھڑی ہوگی، جب کعبہ خدا میں ہماری حاضری ہوگی۔

گزشتہ دنوں ثناء خان نے فوٹو اینڈ ویڈیو شئیرنگ ایپ انسٹاگرام پر ایک پوسٹ شئیر کرتے ہوئے اپنے شوہر انس سید کو شادی کی پہلی سالگرہ کی مبارکباد  دی تھی۔

انہوں نے یہ پوسٹ شئیر کرتے ہوئے اپنے شوہر کے لئے پیار بھرا پیغام تحریر کیا اور کہا کہ میں آپ کے لئے ایسے ہی دعا کرتی ہوں جیسے میں اپنے لئے کرتی ہوں کیونکہ میں جو اپنے لئے چاہتی ہوں وہی آپ کے لئے بھی چاہتی ہوں۔

ثناء خان نے لکھا کہ آپ مجھے اللّٰہ کے نزدیک لے جاتے ہیں گناہوں کے قریب نہیں، آپ بہت اچھے ہیں۔

انہوں نے اپنی خواہش کا اظہار کیا  تھا کہ وہ روضہ رسولﷺ کی زیارت کا بے صبری سے انتظار کر رہی ہیں۔

واضح رہے کہ ثناء خان نے گزشتہ سال بھارتی ریاست گجرات سے تعلق رکھنے والے مفتی انس سے شادی کی تھی۔

بگ باس سیزن 6 سے شہرت پانے والی بالی ووڈ کی سابقہ اداکارہ ثناء خان نے اپنی شادی سے قبل اسلام کی خاطر شوبز انڈسٹری چھوڑنے کا اعلان کیا تھا۔

اس موقع پر ثناء خان کا کہنا تھا کہ اب وہ اپنی زندگی انسانیت کی خدمت میں اور اللّٰہ تعالیٰ کے احکامات کے مطابق گُزاریں گی۔