پاکستان کے معروف اداکار عمران عباس نے اپنی والدہ کے انتقال کے بعد سوشل میڈیا پر پہلی پوسٹ شیئر کر دی۔

اداکار کی جانب سے فوٹو اینڈ ویڈیو شیئرنگ ایپ انسٹاگرام پر اپنی والدہ کے انتقال کے بعد پہلی پوسٹ شئیر کی گئی ہے۔

شئیر کی گئی پوسٹ میں اداکار نے والدہ کے انتقال پر موصول ہونے والے تعزیتی پیغامات پر اپنے مداحوں کا شکریہ ادا کیا۔

انہوں نے کیپشن میں لکھا کہ آپ سب کا تہہ دل سے شکریہ، کاش وہ ہر ایک کو ذاتی طور پر جواب دے سکتے لیکن اس وقت یہ ناممکن لگتا ہے۔

عمران عباس نے لکھا کہ آپ سب کے تعزیتی پیغامات اور میرے والدین کے لئے فاتحہ پڑھنے اور اس مشکل وقت میں اس بات کو یقینی بنانے کے لئے کہ وہ اکیلے نہ پڑیں اُن پر مسلسل نظر رکھنے کے لئے بہت شکریہ۔

انہوں نے لکھا کہ وہ ہمیشہ اپنے دوستوں کے شکر گزار رہیں گے جنہوں نے اُن کی زندگی کے اس مشکل ترین وقت میں اپنی سچی دوستی کا ثبوت دیا، خدا آپ سب کو خوش رکھے۔

واضح رہے کہ اداکار عمران عباس کی والدہ کچھ دنوں پہلے انتقال کر گئی جس کی اطلاع انہوں نے سوشل میڈیا پر دی تھی۔

اداکار نے اپنے سوشل میڈیا اکاؤنٹ پر اپنی والدہ کے حوالے سے ایک خوبصورت تصویر کے ساتھ پیغام بھی جاری کیا تھا۔

اداکار نے اپنے پیغام میں لکھا کہ میں اپنی ماں کے پاؤں اب نہیں چوم سکوں گا کیونکہ آج میں نے اپنی ماں، اپنی جنت کو کھو دیا ہے۔

اداکار نے اپنے پیغام میں مزید بتایا ہے کہ 2 سال قبل اسی دن میں نے اپنے والد کو کھویا تھا اور آج میری ماں بھی مجھے چھوڑ کر چلی گئیں ہیں۔