پاکستان ڈرامہ انڈسٹری کی ابھرتی ہوئی اداکارہ علیزے شاہ نے ریمپ پر گِرنے کی کہانی بتادی۔

علیزے شاہ نے فوٹو اینڈ ویڈیو شئیرنگ ایپ انسٹاگرام پر اپنی تصاویر شئیر کی ہیں۔

انہوں نے اس پوسٹ کو شئیر کرتے ہوئے لاہور میں برائیڈل کاٹیور فیشن ویک کے دوران ریمپ پر گِرنے کو غلط فہمی کا نتیجہ قرار دے دیا۔

اداکارہ نے گِرنے کے واقعے کا تذکرہ کرتے ہوئے کہا کہ اس رات ایک غلط فہمی کی وجہ سے میں پھسل گئی تھی۔

علیزے شاہ نے لکھا کہ میں بائیں طرف جا رہی تھی جبکہ شازیہ منظور نے سوچا کہ ہمیں دائیں طرف جانا ہے جس کی وجہ سے ہم دونوں میں ایک غلط فہمی ہوئی اور اسی دوران میں پھسل گئی۔

 انہوں نے لکھا کہ اس واقعے کے بعد شازیہ منظور نے مجھے پیار سے اٹھایا اور میرا حوصلہ بڑھایا۔

اداکارہ نے امر خان سمیت ساتھی ماڈلز کی حوصلہ افزائی کرنے پر بھی شکریہ ادا کیا۔

واضح رہے کہ صوبہ پنجاب کے شہر لاہور میں برائیڈل کاٹیور فیشن ویک کا انعقاد کیا گیا تھا جہاں پاکستانی ماڈلز سمیت اداکاراؤں نے بھی اپنے حُسن کے جلوے بکھیرے اور خوب تعریفیں وصول کیں۔