پاکستانی گلوکارہ آئمہ بیگ کا خواب پورا ہوگیا جس کا انہیں برسوں سے انتظار تھا۔

 گلوکارہ نے فوٹو اینڈ ویڈیو شیئرنگ ایپ انسٹاگرام پر ایک اسکرین شاٹ شیئر کیا جو کہ سویڈش آڈیو اسٹریمنگ اور میڈیا سروس، اسپاٹی فائے کی جانب سے جاری کی گئی ایک فہرست سے لیا گیا ہے۔

گلوکارہ نے اس پوسٹ کو شیئر کرتے ہوئے لکھا کہ وہ مذاق نہیں کررہیں ان کا خواب سچ ہوگیا ہے۔

آئمہ بیگ کی جانب سے شئیر کیے گئے اسپاٹی فائے کی اس فہرست کے مطابق آئمہ بیگ سال 2021 میں پاکستان کی سب سے زیادہ سنی جانے والی مقامی خاتون گلوکارہ ہیں۔

خیال رہے کہ آڈیو اسٹریمنگ میوزک ویب سائٹ اسپاٹی فائے کو رواں برس میں پاکستان میں متعارف کروایا گیا تھا جس نے اب پاکستان میں سنے جانے والے فنکاروں، گانوں اور پلے لسٹس کی فہرست جاری کی ہے۔

پاکستانی صارفین نے سال 2021 میں بھارتی گلوکار ارجیت سنگھ کے گانے سب سے زیادہ سنے ہیں جبکہ اس فہرست میں دوسرا نمبر پاکستانی گلوکارعاطف اسلم کا ہے۔