پاکستان کی معروف اداکارہ زارا نور عباس نے قومی ایئر لائن کو بند کرنے کا مشورہ دے دیا۔

زارا نور نے اپنی ایک انسٹاگرام اسٹوری میں پی آئی اے میں مسافروں کے ساتھ پپش آنے والے واقعے کے تناظر میں کہا کہ کیا اس ایئر لائن پر پابندی لگائی جا سکتی ہے؟

واضح رہے کہ گزشتہ دنوں اسلام آباد سے کراچی آنے والی پی آئی اے کی پرواز پی کے 301 میں جہاز کے چلتے ہی زوردار آوازیں آنے لگیں جس کے بعد مسافروں نے احتجاج کر کے طیارہ رُکوادیا اور اُتر گئے۔

صبح 10 بجے روانہ ہونے والی پرواز نے 2 گھنٹے تاخیر سے اڑان بھری تو طیارے نے خوف ناک آوازوں کے ساتھ فضا میں جھٹکے لینا شروع کردیے جس سے مسافروں کی چیخیں نکل گئیں۔

ترجمان پی آئی اے کا کہنا تھا کہ پرواز پی کے 301 کے 70 مسافروں نے سفر سے انکار کر دیا اور چلے گئے، باقی 54 مسافروں کے لیے متبادل پرواز پی کے 309 کا انتظام کیا گیا جبکہ پرواز پی کے 301 صرف چھ مسافروں کو لے کر شام ساڑھے 7 بجے کراچی پہنچی۔

مسافروں کا کہنا تھا کہ وہ پورے راستے اللّٰہ اللّٰہ کرتے رہے۔