بھارتی اداکارہ وسیاستدان جیابچن نے اپنے شوہر لیجنڈری اداکار امیتابھ بچن کے جھوٹ کی پول کھول دی۔

بھارت کے لیجنڈری اداکار امیتابھ بچن اپنی فلموں سے زیادہ مقبول ترین بھارتی گیم شو ’’ کون بنے گا کروڑ پتی‘‘ سے پہچانے جاتے ہیں اور حال ہی میں ان کے گیم شو نے ایک اہم سنگ میل عبور کیا۔

گیم شو ’کون بنے گا کروڑ پتی‘ کے میزبان امیتابھ بچن نے 1000ویں قسط میں اپنی بیٹی شوئیتا نندا اور نواسی نویا نویلی نندا کو مدعو کیا جب کہ گھر میں بیٹھی امیتابھ بچن کی اہلیہ جیا بچن بھی ویڈیو کال کے ذریعے شو کا حصہ بنیں۔

بھارتی ٹی وی کے انسٹاگرام کے اکاؤنٹ پر جاری ہونے والے گیم شو کے پرومو میں دیکھا جاسکتا ہے کہ کس طرح اداکارہ جیا بچن اپنے شوہر امیتابھ بچن کے پول کھول رہی ہیں۔

پرومو میں دیکھا جاسکتا ہے کہ لیجنڈری اداکار امیتابھ بچن کی اہلیہ نے اپنے شوہر سے متعلق شکوہ کرتے ہوئے کہا کہ ان کو جب بھی کال کرو تو یہ نہیں اٹھاتے، جس پر اداکار نے جواب دیا کہ دراصل یہ سارا قصور انٹرنیٹ کا ہے ، اگر انٹرنیٹ میں مسئلہ ہے تو ہم کیا کرسکتے ہیں۔

اس دوران اداکار کے ساتھ بیٹھی ان کی بیٹی نے جواب دیا کہ سوشل میڈیا پر تصاویر لگانے اور ٹوئٹ کرنے کے لیے انٹرنیٹ ٹھیک ہے لیکن فون اٹھانے کے لیے نہیں ہے جس پر امیتابھ بچن نے بات گھماتے ہوئے کہا کہ’’جیا بچن آپ کتنی اچھی لگ رہی ہیں‘‘۔

جیا بچن بھی نامور اداکارہ ہیں اور وہ اپنے شوہر کی باتوں میں آئے بغیر جواب دیتی ہیں کہ ’’جھوٹ بولتے ہوئے آپ بالکل اچھے نہیں لگتے‘‘۔