پاکستان شوبز انڈسٹری کی سابقہ اداکارہ نور بخاری نے اب تک اپنا اشتہار ٹی وی پر نشر کرنے والوں پر شدید برہمی کا اظہار کیا ہے۔

نور بخاری نے فوٹو اینڈ ویڈیو شئیرنگ ایپ انسٹاگرام پر جاری کیے گئے پیغام میں کہا کہ میں نے 5 سال قبل ایک بیوٹی کریم کے اشتہار میں کام کیا تھا جو کہ میری اجازت کے بغیر اب تک ٹی وی پر نشر کیا جارہا ہے۔

اُنہوں نے کہا کہ عام طور پر کسی بھی اشتہار کا کنٹریکٹ ایک سال کا ہوتا ہے جس کے لحاظ سے یہ کنٹریکٹ ختم ہوچکا ہے۔

نور بخاری کا کہنا تھا کہ میں اب حجاب کرتی ہوں اور اس طرح میرا پُرانا اشتہار ٹی وی پر نشر کرنا اچھی بات نہیں ہے ،میں نے اب اپنی ساری زندگی اللّہ اور اُس کے دین کے لئے وقف کردی ہے لہٰذا براہِ کرم یہ اشتہار نشر کرنا بند کریں۔

خیال رہے کہ نور بخاری پاکستان فلم انڈسٹری کو خیرباد کہہ کر گزشتہ کئی عرصے سے اپنی زندگی اسلامی تعلیمات کے مطابق گزار رہی ہیں۔