بھارت کی بلاک بسٹر فلم ’’بجرنگی بھائی جان‘‘ کی ’’مُنی‘‘ نے اپنا ایوارڈ سلمان خان اور کبیر خان کے نام کردیا۔

غلطی سے سرحد پارکرنے والی پاکستانی بچی کے کردار پر مُنی یعنی ہرشالی ملہوترا کو ’’فلم بجرنگی بھائی‘‘ سے بے پناہ شہرت ملی۔

اداکارہ ہرشالی ملہوترا کو حال ہی میں 2015 کی فلم ’’بجرنگی بھائی جان‘‘ میں اداکاری کے لیے بھارت رتن ڈاکٹر امبیڈکر نیشنل ایوارڈ ملا۔

منی نے انسٹاگرام پر ایوارڈ کی تصاویر شیئر کیں اور اسے بالی ووڈ کے دبنگ اداکار سلمان خان اور معروف ہدایت کار کبیر خان کے نام کردیا۔

ہرشالی نے ایک اور پوسٹ شیئر کی جس وہ مہاراشٹر کے گورنر بھگت سنگھ کوشیاری سے ایوارڈ وصول کر رہی تھیں۔

یاد رہے سلمان خان کی فلم ’’بجرنگی بھائی جان‘‘ میں ہرشالی ملہوترا نے منی کا کردار ادا کیا تھا جس میں اسے پاکستان کی ایک گونگی لڑکی کے طور پر دکھایا گیا تھا جو بھارت میں گم ہو جاتی ہے جب کہ ہرشالی کی اداکاری کو ناظرین نے بے حد پسند کیا تھا۔

واضح رہے حال ہی میں سلمان خان نے ممبئی میں ’’بجرنگی بھائی جان‘‘ کے سیکوئل کا اعلان بھی کیا تھا۔