کپل شرما کی اہلیہ گنی نے کامیڈین سے پیار کرنے کی وجہ بتادی۔

بھارت کے نامور کامیڈین اور مقبول ترین پروگرام ’دی کپل شرما شو‘ کے میزبان کپل شرما رواں ماہ او ٹی ٹی پر اپنا ڈیبیو کرنے جارہے ہیں اور ان کا اسٹینڈ اپ کامیڈی پروگرام کا آغاز 28 جنوری سے ہوگا جس میں وہ اپنی نجی زندگی کو اپنے مزاحیہ انداز میں لوگوں کے سامنے بیان کریں گے۔

اس سے قبل بھی کپل شرما نے انسٹاگرام پر اپنے پروگرام کا ایک کلپ شیئر کیا تھا جس میں انہوں نے یہ بتایا تھا کہ بھارتی وزیراعظم نریندر مودی کو نشے میں کی گئی ایک ٹوئٹ انہیں 9 لاکھ روپے میں پڑی تھی۔

یہ بھی پڑھیں؛ کپل شرما کو بھارتی وزیراعظم مودی کیخلاف ٹوئٹ کرنا مہنگا پڑگیا

نیٹ فلکس کی جانب سے ’کپل شرما، آئی ایم ناٹ ڈن یٹ‘ کا ایک اور ٹیزر اپ لوڈ کیا گیا جس میں اداکار کپل شرما بتاتے ہیں کہ انہوں نے کس طرح اپنی اہلیہ سے پہلی بار محبت کا اظہار کیا تھا۔

ویڈیو میں کپل شرما نے کہا کہ شادی سے قبل گنی میری اسسٹنٹ تھی اور ہم دونوں ایک ساتھ تھیٹر کیا کرتے تھے لیکن یہ میری سب سے پسندیدہ تھی اس لیے میں اس کی ڈیوٹی لگایا کرتا تھا کہ سیٹ پر پورا دن جو کچھ ہوا ، مجھے بتانا اور یہ مجھے روز بتایا کرتی تھی۔

ایک بار اسی طرح اس کی کال آئی تو میں اس وقت نشے میں تھا، میں نے فون اٹھاتے ہی پوچھ لیا، کیا تم مجھ سے محبت کرتی ہو، جس پر گنی چترتھ بھی حیرت میں مبتلا ہوگئی کہ اس شخص میں اتنی ہمت کہاں سے آگئی۔

بعد ازاں کپل نے اپنے سامنے ہی موجود گنی چترتھ سے پوچھا ’’’تم تو بڑے گھر کی لڑکی ہو ، کیا سوچ کر اس اسکوٹر والے لڑکے سے پیار کیا‘‘؟

گنی بھی کپل شرما ہی کی اہلیہ ہیں، انہوں نے کامیڈین کو یہ کہہ کر لاجواب کردیا ’’ امیر لوگوں سے تو سب ہی پیار کرتے ہیں، میں نے سوچا اس غریب کا بھلا کردوں‘‘۔

واضح رہے کپل اور گنی نے 2018 میں شادی کی تھی اور ان کے دو بچے ہیں۔