اسلام کی خاطر بالی ووڈ سے کنارہ کشی اختیار کرنے والی سابقہ بھارتی اداکارہ ثناء خان نے سوشل میڈیا پر اپنے مداحوں کے لئے معنی خیز پیغام جاری کردیا۔

ثناء خان نے فوٹو اینڈ ویڈیو شئیرنگ ایپ انسٹاگرام پر اپنے شوہر کے ہمراہ  نئی تصویر شیئر کی ہے۔

انہوں نے اس پوسٹ کو معنی خیز کیپشن دیتے ہوئے لکھا کہ جھوٹ کی رفتار بہت تیز ہوتی ہے لیکن منزل پر صرف سچ ہی پہنچتا ہے۔

ثناء خان نے لکھا کہ ان لوگوں سے پریشان نہ ہوں جو آپ کے کردار کو خراب کرنے کی کوشش کر رہے ہیں ،جو لوگ آپ کے بارے میں پیچھے منفی باتیں پھیلاتے ہیں، اُن کی یہ عادت صرف اور صرف ان کے کردار کو ظاہر کرتی ہے۔

انہوں نے لکھا کہ آپ کو وہی ملے گا جو آپ بوتے ہیں۔

اس سے قبل ثناء خان نے اپنے مداحوں کے لئے ویڈیو پیغام جاری کیا تھا۔

ثناء خان نے حال ہی میں اپنے شوہر مفتی انس کے ساتھ عمرہ ادا کیا ہے جس کے بعد اُنہوں نے اپنے مداحوں کے لئے ایک ویڈیو پیغام جاری کرتے ہوئے اللّہ تعالیٰ کا شُکر ادا کرنے کی درخواست کی تھی۔

ثناء خان کا کہنا تھا کہ ہم اپنے رب کا شُکر ادا نہیں کرتے ہیں لیکن پھر بھی وہ ہمیں اپنی نعمتوں سے نوازتا رہتا ہے۔

انہوں نے کہا تھا کہ ہم بہت ناشکرے ہیں جب لوگ ہمیں چیزیں دیتے ہیں تو ہم ان کا بہت شکریہ ادا کرتے ہیں لیکن جب اللّہ تعالیٰ ہمیں اتنا دیتا ہے تو ہم اس کا اتنا شکریہ ادا نہیں کرتے۔

اپنے ویڈیو پیغام میں آبدیدہ ہوتے ہوئے ثناء خان نے کہا کہ آج روضۂ مبارک میں میری آخری مغرب کی نماز ہے، میں یہ سوچ رہی ہوں کہ اللّہ تعالیٰ ہمیں کس قدر دیتا ہے لیکن ہم کبھی بھی اس کا شکریہ ادا نہیں کر سکتے۔

اس سے قبل غلاف کعبہ کی تیاری میں ثناء خان بھی حصہ دار بنی تھیں۔

ثناء خان نے اپنے سوشل میڈیا اکاؤنٹ سے عمرے پر روانگی اور حرم میں موجودگی کی کچھ تصاویر شیئر کی تھیں۔

اس دوران انہوں نے اپنی تمام عبادت کو اپنے شوہر مفتی انس کے ہمراہ مکمل کیا تھا جس کی ایک ویڈیو بھی پوسٹ کی گئی تھی۔

اسکے علاوہ ثناء خان کو اللہ نے وہ شرف بخشا جو ہر مسلمان کی خواہش ہوتی ہے۔

ویڈیو میں ثناء خان غلاف کعبہ کی تیاری میں حصہ دار شمار ہوئیں تھیں اور یہ بہت خوش نصیبی کی بات تھی۔

اس ویڈیو کو شیئر کرتے ہوئے ثناء خان نے لکھا تھا کہ میں نے اپنی زندگی میں کبھی نہیں سوچا تھا کہ اللہ نے میرے نصیب میں یہ سب لکھا تھا۔

گزشتہ سال اداکارہ ثناء خان اپنے شوہر مفتی انس کے ہمراہ عُمرے کی سعادت حاصل کرنے کے لئے سعودی عرب  گئی تھیں۔

ثناء خان نے فوٹو اینڈ ویڈیو شیئرنگ ایپ انسٹاگرام پر اپنے شوہر کے ہمراہ ایک تصویر شیئر کی تھی۔

اس تصویر کو شئیر کرتے ہوئے انہوں نے بتایا تھا کہ وہ شوہر کے ساتھ عُمرے کی سعادت حاصل کرنے جارہی ہیں۔

ثناء خان نے لکھا تھا کہ یہ نکاح کے بعد ہمارا سب سے خوبصورت سفر ہے ،کیا حسین سماں ہوگا، کیا حسین گھڑی ہوگی، جب کعبہ خدا میں ہماری حاضری ہوگی۔

واضح رہے کہ ثناء خان نے گزشتہ سال بھارتی ریاست گجرات سے تعلق رکھنے والے مفتی انس سے شادی کی تھی۔

بگ باس سیزن 6 سے شہرت پانے والی بالی ووڈ کی سابقہ اداکارہ ثناء خان نے اپنی شادی سے قبل اسلام کی خاطر شوبز انڈسٹری چھوڑنے کا اعلان کیا تھا۔