بھارت کی نامور اداکارہ پریانکا چوپڑا نے بالی ووڈ اداکار ابھیشیک بچن کا موبائل چرایا تھا جس کی مکمل حقیقت سامنے آچکی ہے۔

حال ہی میں بھارتی اداکارہ سیمی گریوال نے اپنے انسٹاگرام اکاؤنٹ پر ایک ویڈیو کلپ شیئر کی ہے جو کہ اداکارہ پریانکا چوپڑا سے انٹرویو کی ہے۔

 اس ویڈیو میں سنا جاسکتا ہے کہ سیمی گریوال اداکارہ سے سوال کرتی ہیں کہ آپ نے اداکار ابھیشیک بچن کا موبائل چرایا تھا؟ جس کے جواب میں پریانکا ہنستی ہیں اور کہتی ہیں کہ پہلے ابھیشیک نے ان کا موبائل چرایا تھا۔

اس حوالے سے بات کرتے ہوئے پریانکا چوپڑا نے بتایا کہ فلم ’بلف ماسٹر‘ کی شوٹنگ کے دوران ابھیشیک نے ان کا موبائل چرایا اسے سوئچ آف کیا اور اس پر بیٹھ گئے تھے جبکہ میں اپنا موبائل ڈھونڈتے ہوئے بلکل پاگل ہوچکی تھی۔

 اداکارہ نے بتایا کہ انہوں نے ابھیشیک سے اپنے موبائل کے حوالے سے پوچھا بھی تھا لیکن انہوں نے کہا کہ وہ اس حوالئے سے کچھ نہیں جانتے لیکن تھوڑی ہی دیر بعد ابھیشیک نے انہیں موبائل واپس کیا کیونکہ انہیں شوٹ پر جانا تھا۔

 انہوں نے بات کو جاری رکھتے ہوئے بتایا کہ ایک موقع ایسا آیا کہ جب ابھیشیک اپنا موبائل غلطی سے وین میں بھول گئے تھے اور وین میں میرے ساتھ  رتیش دیش مکھ  بھی موجود تھے۔

پریانکا نے بتایا کہ میں نے موقع کا فائدہ اٹھاتے ہوئے ابھیشیک کا فون اٹھایا اور رانی مکھرجی کو پیار بھرا پیغام بھیج دیا جس کے لئے مجھے  رتیش دیش مکھ نے منع بھی کیا تھا۔

 انہوں نے بتایا کہ ابھیشیک کے موبائل سے رانی کو میسج کرنے پر وہ بہت خوفزدہ ہوگئیں تھیں اور اسی لئے انہوں نے موبائل کا بند کیا اور دونوں وین سے فوری طور پر باہر چلے گئے۔

اپنی بات مکمل کرنے کے بعد پریانکا چوپڑا نے سیمی گریوال سے پوچھا کہ آپ کو اس حوالے سے کیسے پتہ چلا کیونکہ میں نے یہ قصہ کسی سے شیئر نہیں کیا تھا ۔

اداکارہ کو جواب دیتے ہوئے سیمی گریوال کا کہنا تھا کہ یہ میں آپ کو نہیں بتاسکتی ہوں لیکن مجھے اتنا معلوم ہے کہ رانی مکھرجی نے ابھیشیک کو جواب میں پوچھا تھا کہ ’تمہیں کیا ہوگیا ہے؟‘۔

سیمی نے اس ویڈیو کلپ کو شیئر کرتے ہوئے بتایا ہے کہ اس انٹرویو کے دوران یہ ان کا پسندیدہ لمھہ تھا جو کہ سال 2016 میں ہوا تھا۔