ترک ڈراموں کے بعد اب ترک فلمیں بھی پاکستانی سینماؤں کی زینت بننے کے لئے تیار ہیں۔

ڈسٹری بیوشن کلب نے ترک زبان میں بننے والی عالمی شہرت یافتہ فیچر فلم آئیلہ کی نمائش کا اہتمام کیا ہے جو پاکستانی سینماؤں کی زینت بننے والی پہلی ترکش فلم ہوگی۔

اس فلم کی کہانی ایک خوبصورت بچی آئیلہ کی زندگی کا احاطہ کرتی ہے جو ایک ترک فوجی کو میدان جنگ میں ملتی ہے۔

آئیلہ کو پاکستانی سینماؤں میں نمائش کے لئے سنسر سرٹیفکیٹ جاری کیا جاچکا ہے جبکہ اس کی تشہیری مہم کا آغاز بھی کردیا گیا ہے۔

یہ فلم پاکستانی شائقین کو ترک سینما سے متعارف کروائے گی اور پاکستانی سینماؤں میں اس فلم کی نمائش پاکستان اور ترکی کے باہمی تعلقات میں انتہائی اہم سنگ میل ثابت ہوگی۔

ڈسٹری بیوشن کلب کے ایگزیکٹو منیجر شیخ عابد رشید نے بتایا کہ اس فلم کو خصوصی طور پر اردو زبان میں ڈب کروایا گیا ہے۔

ترک فلمیں اپنی معیاری پروڈکشنز اور اچھوتے آئیڈیاز کی بدولت پہلے ہی دنیا بھر کے شائقین کی توجہ کا مرکز ہیں اور مذکورہ فلم آئیلہ بھی اپنی جذباتی کہانی اور فنکاروں کی جاندار اداکاری کے باعث شائقین کی توجہ سمیٹ چکی ہے۔

واضح رہے کہ یہ فلم آئیلہ 11 فروری کو ریلیز کی جارہی ہے۔