پاکستان کے سینئر اداکار نعمان اعجاز نے کہا ہے کہ با وضو ہو کر اپنا کردار ادا کرتا ہوں۔

حال ہی میں اداکار نے ایک انٹرویو میں مداحوں کے ساتھ اپنی نجی و پیشہ ورانہ زندگی سے متعلق بہت سی دلچسپ باتیں شیئر کیں۔

انٹرویو کے دوران انہوں نے بتایا کہ وہ اپنا کام بڑے مذہبی طریقے سے کرتے ہیں، وہ ہمیشہ با وضو ہو کر اپنے کردار ادا کرتے ہیں  اسی لیے کام میں  ایمانداری خود ہی آ جاتی ہے، یہ اُن کے رب کا بڑا کرم ہے۔

اداکار نے بتایا کہ وہ کبھی بھی میک اپ نہیں کرتے، نہ ہی چہرے پر کبھی کوئی فلر کروایا اور نہ کوئی کریم لگائی۔

نعمان اعجاز کا بتانا تھا کہ آج سے 15 سے 16 سال پہلے اُن پر ایک ایسا وقت آیا تھا کہ وہ جائے نماز پر کھڑے ہو کر باقاعدہ دعا مانگا کرتے تھے کہ اللّٰہ مجھے اس کام سے نکال لے، بڑی دعائیں کی اور مجھے لگتا تھا کہ رب کو یہ کام اچھا نہیں لگتا۔

انہوں نے بتایا کہ پھر میری ایک اللّٰہ والے انسان سے بات ہوئی جنہوں نے اُن سے کہا کہ تم کون ہوتے ہو ایسا سوچنے والے، ہو سکتا ہے کہ اس پیشے کے ذریعے تم اللّٰہ کے بندوں تک کوئی اچھا پیغام پہنچا سکو جو یہ پیشہ چھوڑ کر نہیں پہنچایا جا سکتا ہے۔

نعمان اعجاز نے یہ بھی بتایا کہ اُن کا کام کرنے کا انداز بڑا سخت ہے، اور انہوں نے اپنے بیٹے زاویار کو اداکاری سکھانے کی کوشش نہیں کی، اُن کی ٹیکنیکس اور انداز بہت الگ ہے، وہ کرداروں کو اپنے اوپر حاوی کر بیٹھتے ہیں جو کبھی کبھی بہت تکلیف دہ بھی ہوتا ہے۔