مشہور بھارتی کامیڈی شو کے میزبان و اداکار کپل شرما کو ڈلیوری رائیڈر کے روپ میں دیکھ کر مداح پریشان ہوگئے۔

ان دنوں کپل شرما بھارتی اداکارہ اور فلم ڈائریکٹر نندیتا داس کی فلم میں اپنے کردار کی شوٹنگ کے لئے شمالی مشرقی بھارتی ریاست اوڑیسہ کے صدر مقام بھوبینسور میں موجود ہیں۔

 فلم میں کپل ایک فوڈ ڈلیوری رائیڈر کا کردار ادا کرتے نظر آئیں گے۔

 اداکار کپل کے ایک پرستار نے ان کی تصویر شیئر کی ہے جس میں انہیں بائیک پر بیٹھے اپنے پیچھے ایک ڈلیوری بیگ لگائے دیکھا جاسکتا ہے۔

اس تصویر کے ساتھ کیپشن مداح نے لکھا کہ سر میں نے آج آپ کو لائیو دیکھ لیا، جس کے جواب میں کپل نے لکھا کہ کسی کو بتانا مت۔

 ایک اور صارف نے پوچھا کہ سر کیا دوسرا کام ڈھوند لیا ہے؟

ایک صارف نے مذاق کرتے ہوئے لکھا کہ پارٹ ٹائم جاب کرتے ہیں کپل پاجی جبکہ ایک اور نے کہا کہ یہ تو سچ میں کپل ہیں۔

واضح رہے کہ اس فلم میں اپنے کردار کے متعلق کپل نے میڈیا سے گفتگو میں کہا کہ وہ نندیتا کے اس پروجیکٹ کے حوالے سے خاصے پرجوش  اور خوش ہیں۔

حال ہی میں کپل شرما اور نندیتا داس نے اوڑیسہ کے وزیراعلیٰ نوین پٹنائیک سے ملاقات کی تھی اور اس ملاقات کی تصویر کپل نے اپنے سوشل میڈیا پر شیئر کرتے ہوئے لکھا تھا کہ یہ ایک خیر سگالی ملاقات تھی جہاں چیف منسٹر نے ان کی کافی آؤ بھگت کی، وہ جس پر ان کے مشکور ہیں۔