پاکستانی شوبز انڈسٹری کی سینئر اداکارہ ریما خان کی معروف اسلامی اسکالر مولانا طارق جمیل سے ملاقات کی ویڈیو سوشل میڈیا پر وائرل ہو گئی ہے۔

سوشل میڈیا سائٹ انسٹا گرام پر ایک ویڈیو وائرل ہو گئی ہے جس میں اداکارہ کو مولانا طارق جمیل سے ایک تقریب میں بات چیت کرتے ہوئے دیکھا جا سکتا ہے۔

ریما خان کا اظہار خیال کرتے ہوئے کہنا ہے کہ دل کی بہت بڑی خواہش تھی اُن کی  مولانا طارق جمیل سے ملاقات ہو جائے جس پر مولانا طارق جمیل کہتے ہیں کہ آپ کی یہ دعا میرے گھر آکر قبول ہوئی ہے۔

ریما خان نے ہنستے ہوئے کہا کہ یہ میرا مقدر ہے کہ میں آپ کے گھر میں آ کر آپ سے ملی ہوں۔

مولانا طارق جمیل کی جانب سے ریما خان سے کھانا پلیٹ میں نکالنے کا کہا گیا جس پر ریما خان کا پہلے مولانا طارق جمیل کو کھانا لینے کی درخواست کرتے ہوئے کہنا تھا کہ میرے تو ہاتھ کانپ رہے ہیں آپ بسم اللّٰہ کریں۔

اس ویڈیو میں ریما خان مولانا طارق جمیل سے درس اور اسلام کی تعلیم دینے کے لئے وقت بھی مانگ رہی ہیں ۔

واضح رہے کہ ویڈیو میں ریما خان مولانا طارق جمیل سے مل کر بے حد خوش نظر آرہی ہیں۔