موشن پکچر اکیڈمی کی جانب سے اداکار وِل اسمتھ پر آسکر تقریباً میں شرکت پر 10 سال کی پابندی کا عائد کیا جانا، ایک شور مچاتے بچے کو کلاس سے باہر نکالنے سے تشبیہ دیا جا رہا ہے۔

اس حوالے سے اداکار ہیری لینِکس کا کہنا ہے کہ اس موقع پر اگر کوئی شخص آسکر کی ساکھ کو بحال کر سکتا ہے تو وہ خود وِل اسمتھ ہیں۔

انہیں اپنی کی گئی غلطی کے اعتراف میں اپنا ایوارڈ واپس اکیڈمی کو جمع کراتے ہوئے اس بات کا اقرار کرنے کی ضرورت ہے کہ اس ایوارڈ کی 94 سالہ ساکھ کی پیشِ نظر ان کا ضمیر گوارہ نہیں کرتا کہ وہ یہ ایوارڈ رکھیں۔

واضح رہے 27 مارچ کو براہِ راست تقریب میں لاکھوں لوگوں کے سامنے وِل اسمتھ نے میزبان کرس راک کو طمانچہ مارا تھا۔

ہیری لینِکس نے ایک جریدے کے لیے لکھے گئے کالم میں کہا کہ اس معاملے میں سب سے عجیب چیز تھپڑ جڑے جانے کے تقریباً ایک گھنٹے بعد ہی وِل اسمتھ کی جانب سے کی گئی ایوارڈ جیتنے کی غیر حقیقی تقریر تھی۔

ہیری لینِکس نے واقعے کے بعد بھی وِل اسمتھ کو تقریب سے نہ نکالے جانے کے اکیڈمی کے فیصلے کو بھی حیران کن قرار دیا۔

ایوارڈ جیتنے کے بعد کی تقریر میں وِل اسمتھ نے کہا کہ اپنی زندگی کے اس موقع پر، اس لمحے میں، وہ وہ کرنے پر مجبور ہیں جو خدا انہیں کرنے کے لیے کہہ رہا ہے۔

ول اسمتھ کو فلم کِنگ رچرڈ میں بہترین اداکاری کرنے پر آسکر ایوارڈ سے نوازا گیا تھا۔