پاکستان کے معروف کامیڈین و گلوکار علی گل پیر نے وِل اسمتھ اور کرس راک کی وائرل ویڈیو پر دلچسپ پیروڈی بنادی۔

علی گل پیر نے فوٹو اینڈ ویڈیو شیئرنگ ایپ انسٹاگرام پر 2022 کے آسکراکیڈمی ایوارڈز میں اداکار وِل اسمتھ کی اہلیہ کا مذاق اُڑانے پر کامیڈین کرس راک کو مکّا رسید کرنے کے معاملے کی وائرل ویڈیو پر نئی پیروڈی شیئر کردی۔

قومی کرکٹ ٹیم کے سابق کپتان وسیم اکرم کی اہلیہ شنیرا اکرم بھی اس ویڈیو کی تعریف کیے بغیر نہ رہ سکیں۔

اس ہی کے ساتھ ساتھ سوشل میڈیا صارفین کی جانب سے بھی اس ویڈیو کو بہت پسند کیا جارہا ہے۔

ایک صارف نے لکھا کہ وہ انتظار کر رہے تھے کہ علی گل پیر اس واقعے کی پیروڈی بنائیں۔

ایک اور صارف نے لکھا کہ وہ اس واقعے پر اداکار کے ردِعمل کا انتظار کررہے تھے اور یہ پیروڈی اس معاملے کی اصل ویڈیو سے زیادہ بہتر ہے۔

واضح رہے کہ 94 ویں آسکر ایوارڈز کی تقریب کے دوران کامیڈین کرس راک نے میزبانی اور شرکاء کو ہنسانے کی غرض سے اداکار ول اسمتھ کی اہلیہ و اداکارہ جاڈا پنکیٹ اسمتھ کے بارے میں مذاق کیا۔

ول اسمتھ کو کامیڈین کرس راک کا ان کی اہلیہ کے بارے میں کیا گیا مذاق پسند نہیں آیا اور اُنہوں نے غصّے میں لائیو شو کے دوران ہی اسٹیج پر جا کر کرس راک کو مکّا دے مارا۔