پاکستانی شوبز کی سب سے مقبول جوڑیوں میں سے ایک ایمن خان اور منیب بٹ کی تازہ تصاویر سوشل میڈیا پر وائرل ہورہی ہیں۔

ایک تصویر میں ایمن کو ہوائی جہاز کی بزنس کلاس میں منیب کے پہلو میں بیٹھے دیکھا جاسکتا ہے، جبکہ دوسری تصویر دونوں کے ائیرپورٹ پر ہوائی جہاز میں سوار ہونے سے پہلے کی ہے۔

حالانکہ دونوں تصاویر میں انتہائی دلکش نظر آرہے ہیں، اس کے باوجود ناقدین نے ان کا پیچھا نہ چھوڑا اور سوشل میڈیا پر تنقیدی نشتر برسانا شروع کردئیے۔

رِشو ضیا نامی صارف نے لکھا، ‘نکل پڑے پھر سے آوارہ گردی کرنے۔’

جبکہ سادیہ نے پوچھا، ‘روزہ نہیں لگ رہا؟’

نور سحر نے نشاندہی کی کہ ایمن کی ایک ٹانگ مسنگ ہے۔

خدا بخش فرحین نے سوال اٹھایا کہ ‘ہر تصویر میں ایمن ہماری طرف اور منیب ایمن کی طرف کیوں دیکھ رہا ہوتا ہے؟’

خیال رہے کہ ایمن خان اور منیب بٹ نے نومبر 2018 میں شادی کی تھی اور ان کے ہاں اگست 2019 میں بیٹی امل خان کی پیدائش ہوئی تھی۔

ایک انٹرویو کے دوران اداکارہ ایمن خان نے انکشاف کیا تھا کہ ان کے شوہر اور اداکار منیب بٹ انہیں بہن کہا کرتے تھے۔

ایمن کا کہنا تھا کہ ‘میری اور منیب کی پہلی ملاقات شوٹ پر ہوئی، ہم نے ایک ٹیلی فلم کی اور  اس کے بعد ہمارا کوئی رابطہ نہیں ہوا’۔

انہوں نے بتایا کہ ‘اس وقت میں بہت چھوٹی تھی لیکن پھر ہم اچھے دوست بن گئے اور منگنی سے قبل 4 سال گہرے دوست بھی رہے’۔

دوسری جانب منیب بٹ ایک ویب انٹرویو میں انکشاف کرچکے ہیں کہ انہیں ان کی اہلیہ ایمن خان نے پروپوز کیا تھا۔

منیب کا کہنا تھا کہ ‘ایمن نے مجھے پروپوز کیا لیکن وہ اس بات کو مانتی ہی نہیں ہے، ہر پروگرام میں جاکر کہتی ہے کہ وہ ایک مذاق تھا’۔