پاکستانی اداکار مصطفیٰ قریشی کو بالی ووڈ لیجنڈ اداکار دھرمیندر کی اچانک کال آئی تھی۔

مصطفی قریشی نے حال ہی میں ایک شو میں شرکت کی جس میں انہوں نے اداکار دھرمیندر کی جانب سے آئی فون کال کے بارے میں بتایا۔

انہوں نے کہا کہ اداکار دھرمیندر نے پنجابی فلم مولا جٹ میں ان کے مشہور کردار نوری ناتھ کی آواز میں اُن سے بات کی۔

مصطفی قریشی نے بتایا کہ میں لندن میں تھا کہ مجھے ایک مداح کا فون آیا جس نے مجھ سے نوری ناتھ کے لہجے میں بات کی، اس نے مجھ سے ملنے کی بھی درخواست کی۔

انہوں نے بتایا کہ اس مداح نے نوری ناتھ کے لہجے میں پوچھا کہ آپ مجھ سے ملنے آئیں گے یا میں آپ سے ملنے آؤں؟

پاکستانی اداکار نے بتایا کہ میں حیران رہ گیا اور پوچھا کہ وہ کون ہیں جس پر انہوں نے کہا کہ وہ دھرمیندر ہیں۔

اداکار نے بتایا کہ دھرمیندر نے کہا وہ میرے بہت بڑے پرستار ہیں اور میرے ساتھ لنچ کرنا چاہتے ہیں تو میں نے ان سے پوچھا کہ کیا وہ مجھ سے رات کو مل سکتے ہیں جس پر انہوں نے شوٹنگ کے باوجود رات کو مجھ سے ملاقات کی۔

مصطفیٰ قریشی نے بتایا کہ ہماری طویل ملاقات ہوئی، میں لندن میں ان کے گھر گیا اور انہوں نے مجھے بار بار گلے لگایا ، ملاقات کے دوران دھرمیندر کے بیٹے سنی دیول اور بوبی دیول بھی ملنے آئے۔

واضح رہے کہ مصطفی قریشی کا شمار اُن چند مشہور اداکاروں میں ہوتا ہے جو بنیادی طور پر پنجابی فلموں میں اپنے وِلن کرداروں کی وجہ سے نہ صرف پاکستان  بلکہ بھارت میں بھی مقبول ہیں۔