ٹام کروز کی نئی فلم ’ٹاپ گن: میوریک‘ نے عالمی باکس آفس پر کامیابی حاصل کر لی۔

غیر ملکی خبر رساں ادارے کے مطابق فلم ’ٹاپ گن: میوریک‘ نے عالمی باکس آفس پر 90 کروڑ ڈالر سے زائد کا بزنس کرلیا۔

یاد رہے کہ یہ فلم ٹام کروز کی 1986 میں ریلیز ہونے والی فلم ٹاپ گن کا سیکوئیل ہے۔

ٹاپ گن میوریک رواں سال باکس آفس پر سب سے زیادہ منافع کمانے والی دوسری بڑی فلم بھی بن گئی۔

جبکہ پہلے نمبر پر ڈاکٹر اسٹرینج برقرار ہے جس نے 94 کروڑ سے زائد منافع کمایا ہے۔

تاہم ٹاپ گن میوریک کی یہی مقبولیت برقرار رہی تو آئندہ ہفتوں میں یہ رواں برس کی سب سے زیادہ بزنس کرنے والی فلم بن جائے گی۔

اگر ٹاپ گن میوریک یہ ہدف حاصل کرتی ہے تو ’اسپائیڈر مین: نو وے ہوم‘ کے علاوہ یہ دوسری فلم ہوگی جو کورونا وائرس کے دنوں میں ایک ارب ڈالر کا بزنس کرے گی۔

ٹاپ گن: میوریک کو ریلیز ہوئے صرف 25 دن ہوئے ہیں لیکن فلم امریکا میں 47 کروڑ ڈالر سے زائد کا بزنس کر کے مقامی باکس آفس پر پہلے ہی پہلی پوزیشن حاصل کرچکی ہے۔

واضح رہے کہ قبل ازیں 2018 کی ’مشن امپاسیبل: فال آؤٹ‘ 79 کروڑ ڈالر کے ساتھ ٹام کروز کی سب سے زیادہ بزنس کرنے والی فلم تھی۔