ماضی کی معروف اداکارہ نیتو کپور نے دادی بننے کے سوال پر دلچسپ ردِعمل دے دیا۔

سوشل میڈیا پر ایک ویڈیو وائرل ہو گئی ہے جس میں دیکھا جاسکتا ہے کہ پاپارازی نے جب نیتو کپور سے کہا کہ آپ دادی بننے والی ہیں، تو اس پر اداکارہ جواب میں صرف شکریہ کہہ دیتی ہیں۔

اسی ویڈیو میں انہیں یہ بھی کہتے سنا جاسکتا ہے کہ دادی یا نانی بننا اس دنیا کی سب سے بہترین چیز ہے۔

گزشتہ روز اداکارہ عالیہ بھٹ نے فوٹو اینڈ ویڈیو شئیرنگ ایپ انسٹاگرام کے ذریعے مداحوں کو یہ خوشخبری سنائی تھی۔

انہوں نے انسٹاگرام پر ایک تصویر شیئر کی تھی جس میں شوہر و اداکار رنبیر کپور کو بھی دیکھا گیا تھا۔

وائرل تصویر میں عالیہ بھٹ اسپتال میں موجود تھیں اور اپنا الٹراساؤنڈ کروا رہی تھیں۔

عالیہ بھٹ نے تصویر کے کیپشن میں لکھا تھا کہ اُن کے ہاں جلد بچے کی پیدائش متوقع ہے۔

اداکارہ کو مداحوں اور اہلخانہ کی جانب سے مبارکباد دینے کا سلسلہ شروع ہوگیا تھا۔

یاد رہے کہ رواں سال اپریل میں رنبیر اور عالیہ بھٹ ممبئی کے علاقے باندرہ میں واقع رہائش گاہ واستوو میں شادی کے بندھن میں بندھے تھے۔

شادی کی اس چھوٹی سی اور محدود تقریب میں صرف دونوں جانب سے لگ بھگ 30 سے 35 قریبی رشتہ داروں اور دوستوں نے شرکت کی تھی۔

اداکارہ کی فلم برہمسترا کا آفیشل ٹریلر 15 جون کو ریلیز کردیا گیا ہے جبکہ یہ فلم رواں سال 9 ستمبر کو متعدد زبانوں میں سنیما گھروں کی زینت بنے گی۔