پاکستانی اداکارہ میرا پریس کانفرنس کے دوران رو پڑیں جس کی ویڈیو سوشل میڈیا پر وائرل ہو گئی ہے۔

سوشل میڈیا کے مختلف پیجز پر ایک ویڈیو وائرل ہو گئی ہے جس میں دیکھا جاسکتا ہے کہ پریس کلب میں بات کرتے ہوئے میرا نے کہا پاکستان فلم انڈسٹری کے حوالے سے افسوسناک خبر ہے کہ میر ی ایک فلم دیوداس بنی جسے نمائش کے لیے سینما نہیں دیا گیا۔

انہوں نے کہا کہ میری فلم کے پروڈیوسر نے اپنا سارا پیسہ اس فلم کو بنانے میں لگا دیا اوراب وہ علیل ہیں لیکن ان کی فلم کو ایک سینما تک نہیں دیا گیا، کہتے ہیں کہ یہ بی کلاس پروڈکشن ہے تومجھے بتایا جائے کہ یہاں پرکون سی اے کلاس پروڈکشن ہورہی ہے۔

اداکارہ نے پنجابی زبان کو خوبصورت اور قابل عزت کہتے ہوئے کہا کہ کراچی میں ایسی بہت سی فلمیں بن رہی ہیں جو کہ دیکھنے کے قابل بھی نہیں ہیں لیکن ان فلموں کو سینما بھی مل رہے ہیں اور ڈسٹری بیوٹرز بھی۔

میرا نے کہا کہ میرا مقصد خبروں میں آنا ہرگز نہیں ہے لیکن جب ہم اس حوالے سے بات کریں تو میڈیا پر کہا جاتا ہے کہ ہم تنازع پیدا کر رہے ہیں کیونکہ ہمیں خبروں میں جگہ چاہئیے۔

انہوں نے پاکستان میں فلم اکیڈمی کا قیام ناگزیر قرار دیتے ہوئے کہا کہ اس اقدام سے ابھرتے ہوئے فنکاروں کو اپنی صلاحیتوں کے اظہار کا بھرپورموقع مل سکتا ہے۔

اداکارہ کا کہنا تھا کہ میں کیمرے کے پیچھے رہ کر کام کرنے کی خواہشمند ہوں اوراس کے لیے فنڈ ریزنگ اور نیا ٹیلنٹ سامنے لانے کی کوششں کررہی ہوں۔