رکن قومی اسمبلی ڈاکٹر عامر لیاقت کے اچانک انتقال سے کافی لوگ افسردہ ہیں۔

عامر لیاقت نے انتقال سے قبل ایک ویڈیو بنائی تھی جس میں وہ پاکستان چھوڑ کرجانے کا کہہ رہے تھے۔

ڈاکٹر عامر لیاقت کے قریبی دوست اسلم رحمان نے بتایا ہے کہ عامر لیاقت ملک چھوڑ کر ہالینڈ جانا چاہتے تھے اور انہوں نے پارسپورٹ بھی جمع کروا رکھا تھا۔

اسلم رحمان کا کہنا تھا کہ وہ ہالینڈ میں دینی تعلیم دینا چاہتے تھے، عامر لیاقت اپنی نجی زندگی سے متعلق ویڈیوز سے پریشان تھے اور وہ فون پر یہ بھی کہتے تھے ان کی زندگی کو خطرہ ہے۔

واضح رہے کہ ڈاکٹر عامر لیاقت حسین 9 جون کو کراچی میں انتقال کرگئے تھے۔

عامر لیاقت حسین کو تشویشناک حالت میں اسپتال منتقل کیا گیا تھا جہاں ڈاکٹرز نے معائنے کے بعد انتقال کی تصدیق کی، جبکہ ان کے ڈرائیور جاوید نے پہلے ہی موت کی تصدیق کردی تھی۔

ڈاکٹرز کا کہنا ہے کہ عامر لیاقت حسین کو جب اسپتال لایا گیا تو وہ انتقال کر چکے تھے۔

ڈرائیور جاوید کا کہنا تھا کہ گھر میں عامر لیاقت کے کمرے کا دروازہ کھٹکھٹایا گیا تاہم اندر سے کوئی جواب موصول نہیں ہوا۔

عامر لیاقت حسین اپنے آبائی گھر خداداد کالونی میں موجود تھے، گھر پر موجود ملازمین دروازہ کھول کر اندر گئے تو وہ بے ہوش حالت میں بستر پر موجود تھے جس کے فوری بعد انہیں اسپتال منتقل کیا گیا۔

عامر لیاقت حسین کی تدفین عبداللہ شاہ غازی کے مزار میں کی گئی ہے، جہاں انکے والدین کی بھی قبریں موجود ہیں۔