پاکستان کی معروف اداکارہ سونیا حسین کا سابق رکن قومی اسمبلی اور ٹی وی میزبان عامر لیاقت حسین کے انتقال پر ویڈیو پیغام سامنے آگیا۔

اداکارہ کی جانب سے فوٹو اینڈ ویڈیو شئیرنگ ایپ انسٹاگرام پر ایک ویڈیو پیغام شئیر کیا گیا ہے جس میں مرحوم عامر لیاقت حسین کے بارے میں گفتگو کر رہی ہیں۔

انہوں نے عامر لیاقت حسین کے انتقال پر دکھ کا اظہار کرتے ہوئے کہا کہ مجھے اتنے دن سے سمجھ ہی نہیں آ رہا کہ میں عامر لیاقت کے انتقال پر کیا لکھوں، جس وقت مجھے یہ خبر ملی میں سیٹ پر تھی اور میں نے سنتے ہی کہا کہ یہ فیک نیوز ہوگی۔

سونیا حسین کا کہنا تھا کہ یہ خبر میں نے بہت سے لوگوں سے شیئر کی اور لوگوں کے تاثرات دیکھ کر بہت حیرت ہوئی جب کچھ افراد نے کہا کہ افسوس ہوا لیکن کچھ نے کہا کہ اچھا ہوا وہ اس دنیا سے چلے گئے۔

اداکارہ نے کہا کہ کوئی بھی شخص کسی کی موت پر ایسے کیسے کہہ سکتا ہے ،مجھے شدید دکھ ہے۔

انہوں نے دانیہ ملک کو بھی تنقید کا نشانہ بناتے ہوئے کہا کہ پہلی بار دیکھ رہی ہوں شادی کے بعد بھی ایسے ذاتی لمحات سوشل میڈیا پر شیئر کیے جا سکتے ہیں تو انسان کس چیز  پر یقین کرے؟

سونیا حسین نے کہا کہ ایسے نکاح کا کیا فائدہ؟ ایسے رشتے میں بندھنے کا کیا فائدہ؟ جب آپ خود کو محفوظ ہی نہ سمجھ سکیں۔

اداکارہ نے کہا کہ ہمیں چاہئیے کہ ایسی چیزوں کو پروموٹ کرنا بند کریں،ہم بہت غلط راستے پہ چل رہے ہیں، مجھ سے عہد کریں کہ آئندہ ہم کسی کے ڈپریشن کا ذریعہ نہ بنیں اس جگہ پہ کل کو میں نہ ہوں یا آپ نہ ہوں۔