اسلام کی خاطر بالی ووڈ سے کنارہ کشی اختیار کرنے والی سابقہ بھارتی اداکارہ ثناء خان نے عرفات سے ویڈیو پیغام جاری کیا ہے۔

ثناء خان نے اپنے ویڈیو پیغام میں کہا کہ ہم عرفات میں ہیں اور جب ہم کُھلے میدان میں جائیں گے تو وہ جذبات الفاظ میں بیان نہیں کرسکتی۔

اُنہوں نے کہا کہ اللّٰہ تعالیٰ کا بہت احسان ہے، ہمیں حج کے لیے چُنا اور ہمیں کثرت سے دُعا کرنی ہے، اپنے گناہوں کی بخشش کروانی ہے۔

سابقہ اداکارہ نے کہا کہ جو لوگ رواں سال حج نہیں کرسکے، وہ بھی کثرت سے دُعا کریں کیونکہ اللّٰہ تعالیٰ ہم سب کی دُعا سُنتے ہیں،ان شاء اللّٰہ! اگلے سال آپ لوگ یہاں حاجی بن کر آئیں گے۔

یاد رہے کہ بگ باس سیزن 6 سے شہرت پانے والی سابق بالی ووڈ اداکارہ ثناء خان نے 2020ء میں بھارتی ریاست گجرات سے تعلق رکھنے والے مفتی انس سے شادی کی تھی۔

ثناء خان نے اپنی شادی سے قبل اسلام کی خاطر شوبز انڈسٹری چھوڑنے کا اعلان کیا تھا۔

اس موقع پر انہوں نے کہا تھا کہ اب وہ اپنی زندگی انسانیت کی خدمت میں اور اللّٰہ تعالیٰ کے احکامات کے مطابق گُزاریں گی۔