پاکستان کی  مشہور گلوکارہ حدیقہ کیانی اوربھارتی گلوکار سونو نگم نے اپنی آواز کا جادو جگا کر کنسرٹ کو چار چاند لگا دیے۔

حال ہی میں سوشل میڈیا پر ایک ویڈیو وائر ہوئی جس میں دونوں گلوکار دبئی کے کنسرٹ میں گانا گا رہے ہیں۔

ویڈیو میں دیکھا جاسکتا ہے کہ دونوں گلوکار اسٹیج پر موجود ہیں جہاں وہ اپنی آواز سے مداحوں کے چہروں پر خوشیاں بکھیر رہے ہیں۔

دونوں گلوکاروں نے مشہور گانا ’ہونا تھا پیار‘ گایا جس کو وہاں موجود لوگوں کی جانب سے خوب پسند کیا گیا۔

یہ پہلی بار ہے کہ دونوں گلوکار ایک ساتھ گانا گا رہے ہیں۔

یہ واضح نہیں ہے کہ یہ کنسرٹ کب منعقد ہوا لیکن گلوکاری کے دو باصلاحیت ستاروں کی پرفارمنس کو سامعین کی جانب سے زبردست پذیرائی ملی۔

یاد رہے کہ ’ہونا تھا پیار‘گانا میں حدیقہ کیانی اور عاطف اسلم نے شعیب منصور کی فلم ’بول ‘کے لیے گایا تھا۔

حدیقہ کیانی نے’پوہے باریاں‘، ’اڈاری‘، ’جانے اس دل‘ اور کئی مشہور گانے گائے جبکہ سونو نگم نے ’اب مجھے رات دن‘، ’تیرا ملنا پل دو پل کا‘، ’دیوانہ تیرا‘ اور کئی گانوں میں اپنی آواز کا جادو جگایا۔