مرحوم عامر لیاقت حسین کی بیٹی دعا عامر نے ان کی تیسری اہلیہ دانیہ ملک کے خلاف فیڈرل انویسٹی گیشن اتھارٹی (ایف آئی اے) سائبر کرائم سرکل میں درخواست جمع کرادی ہے۔

عامر لیاقت کی پہلی اہلیہ بشریٰ اقبال نے ٹوئٹر پر کہا تھا کہ آج ہم دانیہ اور ان کی والدہ کے خلاف ایف آئی اے سائبر کرائم میں درخواست جمع کرانے جارہے ہیں۔

درخواست جمع کرانے کے بعد دعا عامر نے میڈیا سے گفتگو میں کہا، “ہم بھی یہ ہی چاہتے ہیں کہ دانیہ کو سزا ملے، ہم نے پہلے ہی سوچ رکھا تھا کہ دانیہ ملک کے خلاف کیس دائر کریں گے۔”

دعا کا مزید کہنا تھا کہ “اب چونکہ وہ بیوی بن کر پوسٹ مارٹم کے کیس میں کودی ہے, اسی لیے ہمیں فوری ایکشن لینا پڑا، ہمیں امید ہے کہ ایف آئی اے ایکشن لے گا اور اسے گرفتار کرے گا، ہم نے تمام ثبوت مہیا کردیے ہیں۔”

عامر لیاقت کی بیٹی کا کہنا تھا کہ “میں آپ سب سے یہی چاہتی ہوں کہ ہمیں دانیہ کے کیس میں وہی سپورٹ دیں جو اب تک دیتے آئے ہیں۔

انہوں نے بتایا کہ “ایف آئی اے نے اطمینان دلایا ہے وہ دانیہ کے خلاف تحقیقات کریں گے اور ایکشن لیں گے۔”

قبل ازیں، عامر لیاقت کی تیسری اہلیہ دانیہ ملک نے عدالت میں اپنے مرحوم شوہر کی قبر کشائی اور پوسٹ مارٹم کرانے کی درخواست دائر کی ہے۔

انہوں نے عامر لیاقت کی جائیداد پر حق ظاہر کیا ہے۔