پاکستان شوبز انڈسٹری کی معروف اداکارہ عریشہ رضی نے شادی کرلی ہے جس کی تصاویر اور ویڈیوز سوشل میڈیا پر وائرل ہوگئی ہیں۔

اداکارہ نے اس پرائیویٹ فیملی ایونٹ کی تصاویر وائرل ہونے پر برہمی کا اظہار کیا ہے۔

انہوں نے اپنی انسٹاگرام اسٹوری پر لکھا کہ آپ لوگوں نے میرے نکاح کی وائرل ہونے والی ویڈیو دیکھی ہے یہ ایک نجی تقریب تھی۔

عریشہ رضی نے فوٹوگرافر کپمنی کو مخاطب کرتے ہوئے لکھا کہ یہ انتہائی شرمناک اور دل دکھانے والی حرکت ہے جنہوں نے میرے نکاح کی ویڈیو میری اجازت کے بغیر سوشل میڈیا پر پوسٹ کردی حالانکہ وہ جانتے تھے کہ یہ ایک نجی تقریب ہے ۔

اداکارہ کا لکھنا تھا کہ فوٹوگرافر کمپنی نے صرف تھوڑے سے نام اور ویوز کے لیے میرے اہلخانہ کے لمحات کو وائرل کردیا، میں اپنی زندگی کے خوبصورت لمحات کی تصاویر خود شیئر کرتی۔

انہوں نے اپنے مداحوں سے کہا کہ ایسی کمپنی سے کوئی بھی کام نہ کروائے جو آپ کی اجازت کے بغیر آپ کے نجی تقریب کی تصاویر سوشل میڈیا پر شیئر کردیں۔

تاہم مذکورہ اسٹوڈیو نے عریشہ رضی کے الزامات کو مسترد کرتے ہوئے اپنے بیان میں کہا کہ ہم کنٹریکٹ کے مطابق اپنے ہر کسٹمر کی ویڈیوز اور تصاویر اپنے اکاؤنٹ پر شیئر کرنے کا حق رکھتے ہیں جبکہ ہم نے اداکارہ سے اجازت بھی طلب کی تھی۔

گزشتہ روز عریشہ رضی خان کی سوشل میڈیا پر نکاح کی تصاویر اور ویڈیوز وائرل ہوگئی تھیں جسے دیکھنے کے بعد اداکارہ کے مداح حیرانگی کا اظہار کر رہے تھے۔

اداکارہ اس خاص دن کے موقع پر بے حد خوبصورت اور بااعتماد نظر آ رہی تھیں۔

اداکارہ نے تاحال اپنے انسٹا گرام اکاؤنٹ پر تو نکاح کی تقریب  کی کوئی تصویر یا ویڈیو شیئر نہیں کی لیکن انہوں نے چاہنے والوں کی جانب سے ملنے والی مبارک باد اور نیک تمناؤں پر شکریہ ادا کیا۔

وائرل تصاویر کو انٹرنیٹ صارفین کی جانب سے بہت پسند کیا جارہا ہے اور تعریفوں کا سلسلہ بھی جاری ہے۔

واضح رہے کہ اداکارہ عریشہ رضی خان چائلڈ اسٹار کے طور پر نظر آنے کے بعد شہرت کی بلندیوں پر پہنچیں۔