متنازع بیانات اور فوٹو شوٹس سے شہرت پانے والی بھارتی ماڈل عرفی جاوید بالی ووڈ اداکارہ راکھی ساونت کے ساتھ اپنا موازنہ کیے جانے پر برہم ہو گئیں۔

انڈیا ٹوڈے کے مطابق انٹرنیٹ صارفین کی جانب سے یہ کہا جارہا ہے کہ لوگوں کی توجہ حاصل کرنے اور سستی شہرت پانے والی عرفی جاوید مستقبل کی راکھی ساونت ہیں جو خبروں میں رہنے کے لیے جان بوجھ کر الٹے سیدھے بیانات دیتی ہیں۔

عرفی جاوید نے راکھی ساونت سے موازنہ کیے جانے پر اپنے انسٹاگرام اکاؤنٹ پر ایک پوسٹ میں کہا کہ صرف اس لیے کہ تم چند انٹرنیشنل برانڈز کو جانتے ہو اور اپنی تصاویر فلٹر لگا کر خوبصورت بنا لیتے ہو، تم سوچتے ہو کہ میری توہین کر سکتے ہو؟

انہوں نے کہا کہ راکھی ایک لیجنڈ ہے، تم لوگ اس کی بھی ہتک کرتے ہو اور پھر حقوق نسواں کے علمبردار بھی بنتے ہو، تم سمجھتے ہو کہ راکھی ساونت کے ساتھ میرا موازنہ کرکے تم میری ہتک کر رہے ہو؟

ماڈل نے لکھا کہ تمہارا یہ رویہ تمہیں لوزر ہی بنائے گا، اپنی اس پوسٹ میں عرفی جاوید نے انٹرنیٹ صارفین کے کچھ کمنٹس کا اسکرین شاٹ بھی شیئر کیا، جس میں وہ اسے مستقبل کی راکھی ساونت قرار دے رہے تھے۔