پاکستان شوبز انڈسٹری کے اداکار شہریار منور نے اداکارہ سجل علی کے ساتھ اپنے بولڈ فوٹو شوٹ پر تنقید کرنے والوں کو آڑے ہاتھوں لے لیا۔

اداکار شہریار منور نے فوٹو اینڈ ویڈیو شیئرنگ ایپ انسٹاگرام پر بولڈ فوٹو شوٹ کی چند تصاویر شیئر کرتے ہوئے تنقید کرنے والوں کو آڑے ہاتھوں لے لیا۔

انہوں نے تصویر کے کیپشن میں لکھا کہ اس بات کا خیال رکھیں کہ ہم مختلف کرداروں کو نبھانے والے اداکار ہیں، ہمارے کرداروں سے محظوظ ہوں، یہ ہی آرٹ ہے۔

اداکار کا لکھنا تھا کہ اس گلیمرز شوٹ کا خیال امریکی مصنف آرتھر ملر اور اداکارہ مارلن منرو کے رومانوی تعلقات سے لے کر ہندوستانی ہدایت کار کمال امروہی اور اداکارہ مینا کماری کی محبت ، شادی اور پھر اختلافات جیسی حقیقی کہانیوں سے ماخوذ کیا گیا ہے۔

شہریار منور نے ایک تصویر کا حوالہ دیتے ہوئے کہا کہ آرٹسٹ اپنے محبوب کا مجسمہ بنانے کی بجائے اپنا مجسمہ تراش رہا ہے جو اس کی خود پسندی کو ظاہر کر رہا ہے جسے ازدواجی رشتے میں بدسلوکی و زیادتی کے استعارے کے طور پر استعمال کیا گیا ہے۔

انہوں نے لکھا کہ یہ ہی آرٹ ہے اور اس سے لطف اندوز ہوں۔

یاد رہے کہ اداکار شہریار منور اور اداکارہ سجل علی کے اس بولڈ فوٹو شوٹ کو سوشل میڈیا صارفین کی جانب سے سخت تنقید کا نشانہ بنایا جارہا ہے۔