بالی ووڈ کے سپر اسٹارز شاہ رخ خان اور سلمان خان کو بڑے پردے پر ایک ساتھ ایک فلم میں دیکھنا ہر فلم بین کا خواب رہا ہے لیکن اب یہ خواب پورا ہوتا لگ رہا ہے۔

بھارتی میڈیا رپورٹس کے مطابق شاہ رخ خان اور سلمان خان دونوں ایک ساتھ یش راج بینر تلے بننے والی بالی ووڈ کی سب سے بڑی ایکشن فلم میں ساتھ کام کرنے جارہے ہیں۔

’شاہ رخ خان اور سلمان خان کی اس فلم کو مایہ ناز پروڈیوسر، ڈائیریکٹر اور رائٹر ادتیا چوپڑا لکھ رہے ہیں۔

اس فلم کا مرکزی خیال تیار کیا جا چکا ہے جبکہ ادتیا چوپڑا اس فلم کی کہانی،اسکرین پلے اور ڈایئلاگ پر مزید کام کریں گے۔

شاہ رخ خان اور سلمان خان کی 1995  میں ریلیز ہو نے والی فلم  ’کرن ارجن‘ کے بعد یہ پہلی مکمل ایک ساتھ فلم ہوگی۔

اس فلم کی کہانی رواں سال کے آخر میں شاہ رخ خان اور سلمان خان کو سنائی جائے گی اور فلم کی شوٹنگ 2023 کے آخر یا 2024 کے اوائل میں شروع کی جائے گی۔

واضح رہے کہ 2023 میں شاہ رخ خان کی تین فلمیں پٹھان، جوان اور ڈنکی ریلیز ہو رہی ہیں جبکہ سلمان خان کی فلم ٹائیگر 3 بھی 2023 میں ہی ریلیز کے لیے تیار ہے۔

صرف یہی نہیں بلکہ سلمان خان شاہ رخ خان کی فلم پٹھان میں جبکہ شاہ رخ خان ٹائیگر 3 میں مختصر کردار ادا کریں گے۔

اس سے پہلے دونوں خان کرن ارجن، ہم تمھارے ہیں صنم، دشمن دنیا کا، کچھ کچھ ہوتا ہے، ہر دل جو پیار کرے گا، اوم شانتی اوم، ٹیوب لائٹ اور زیرو میں مکمل اور مختصر کردار ادا کر چکے ہیں۔