بالی وڈ اداکار عامر خان نے اپنے خاندان کے حوالے سے اہم راز بتا دیا۔

غیر ملکی خبررساں ادارے کے مطابق اداکارعامر خان نے بتایا کہ وہ اُن لوگوں میں سے نہیں ہیں جو منہ میں چاندی کا چمچہ لے کر پیدا ہوتے ہیں۔

عامر خان اپنے خاندان، والد اور زندگی کے تلخ تجربے کے بارے میں بات کی۔

یاد رہے کہ اداکار کا تعلق ایسے خاندان سے ہے، جو کئی دہائیوں سے بالی ووڈ سے وابستہ ہے، اُن کے والد طاہر حسین فلم پروڈیوسر تھے۔

جبکہ چچا ناصر حسین نے دل دے دیکھو، یادوں کی بارات اور عامر خان کی پہلی فلم قیامت سے قیامت بنائیں۔

عامر خان کے والد طاہر حسین نے 1960 کی دہائی میں بطور اداکار فلم جب پیار کسی سے ہوتا ہے اور پیار کا موسم جیسی فلمیں کیں، لیکن پھر انہوں نے فلمیں پروڈیوس کرنا شروع کردیں۔

انہوں نے انٹرویو میں بتایا کہ میرا خاندان امیر نہیں تھا، میں منہ میں چاندی کا چمچہ لے کر پیدا نہیں ہوا، اس کی وجہ یہ ہے کہ میرے والد صاحب اچھے بزنس مین نہیں تھے، وہ ہمیشہ پیسے گنواتے تھے۔

عامر خان نے بتایا کہ میرے والد صاحب بہت قرض دار تھے، ایک وقت ایسا بھی آیا کہ ہمارا خاندان تقریباً بے گھر ہونے ہی والا تھا۔

دوسری جانب انہوں نے بتایا کہ بہت سے لوگ کہتے ہیں آپ انڈسٹری میں ہیں کیونکہ آپ کے والد فلم پروڈیوسر تھے، اس لیے آپ امیر ہیں جبکہ حقیقت یہ نہیں ہے۔

اس سے قبل بھی عامر خان اپنے ماضی پر گفتگو کرتے ہوئے بتاچکے ہیں کہ اُن کے پاس اکثر اسکول فیس کے پیسے نہیں ہوتے تھے، یہی وجہ ہے ہمیں اسکول اسمبلی میں ذلت کا سامنا کرنا پڑتا تھا۔

واضح رہے کہ عامر خان آج کل اپنی فلم لال سنگھ چڈھا کی پروموشن میں مصروف ہیں۔