بالی ووڈ اداکار رنویر سنگھ کے خلاف عریاں فوٹو شوٹ کروانے پر باقاعدہ قانونی کارروائی کا آغاز کر دیا گیا ہے۔

بھارتی میڈیا رپورٹس کے مطابق ممبئی پولیس نے تفتیش کے لیے 22 اگست کو رنویر سنگھ کو تھانے میں حاضر ہونے کا سمن جاری کیا ہے جو کہ ان کے گھر بھجوا دیا گیا ہے۔

بھارتی میڈیا رپورٹس کا بتانا ہے کہ رنویر سنگھ کے بے لباس فوٹو شوٹ کے خلاف ایک بھارتی این جی او کی جانب سے دائر درخواست پر یہ کارروائی کی جا رہی ہے۔

یاد رہے کہ اداکار کی جانب سے کروائے گئے برہنہ فوٹو شوٹ کے بعد 26 جولائی کو بھارتی ریاست مہاراشٹر کے شہر ممبئی کی ایک نان گورنمنٹ آرگنائزیشن (این جی او) نے پولیس کو مقدمہ دائر کرنے کی درخواست جمع کروائی تھی۔

بھارتی میڈیا کے مطابق این جی او کی درخواست پر ممبئی پولیس نے اسی روز ہی اداکار کے خلاف تعزیرات ہند اور انفارمیشن ٹیکنالوجی ایکٹ کی دفعات کے تحت مقدمہ دائر کیا تھا۔

پولیس نے بتایا تھا کہ تفتیش سے معلوم ہوا ہے رنویر سنگھ نے بھاری رقم کے عوض کم عمر بچوں اور سماج پر پڑنے والے منفی اثرات کے لیے فوٹوشوٹ کروایا ہے۔