معروف گلوکارہ نازیہ حسن کے گانے آپ جیسا کوئی میری زندگی میں آئے نے دنیا کے سب سے بڑے آرٹ میوزیم میں دھوم مچا دی۔

لندن کے دی وکٹوریہ اینڈ البرٹ میوزیم کی کچھ ویڈیوز سوشل میڈیا پر وائرل ہو گئی ہیں۔

ویڈیوز میں دیکھا جاسکتا ہے کہ میوزیم میں ایک ایونٹ کے دوران موجود ڈی جے نے پاکستان کی مرحوم گلوکارہ نازیہ حسن کا مشہور گانا آپ جیسا کوئی میری زندگی میں آئے لگادیا جسے بہت پسند کیا گیا۔

اس ویڈیو کو دیکھنے کے بعد گلوکارہ کے مداحوں کی جانب سے مختلف تبصرے بھی کیے جارہے ہیں۔

ایک صارف نے خوشی کا اظہار کرتے ہوئے لکھا کہ آج گلوکارہ نے ایک اور سنگِ میل عبور کرلیا۔

واضح رہے کہ لاکھوں دلوں پر راج کرنے والی مقبول ترین پاپ کوئین نازیہ حسن  کا شمار برصغیر میں پاپ موسیقی کے بانیوں میں کیا جاتا ہے۔

سریلی آواز اور لاکھوں دلوں کو چرانے والی پاپ موسیقی کی ملکہ نازیہ حسن نے جو گایا خوب گایا۔

تین اپریل 1965 کو کراچی میں پیدا ہونے والی نازیہ حسن نے موسیقی سے ایسی دوستی نبھائی کہ دنیا نے دیکھی ۔

انہوں نے سرکاری چینل کے پروگرام سے موسیقی کے سفر کا کامیاب آغاز کیا ۔

80 کی دہائی میں آپ جیسا کوئی میری زندگی میں آئے گیت نے ان پر شہرت کے دروازے کھول دیے۔

 1981 میں ان کے پہلے آڈیو البم ڈسکو دیوانے کی دنیا بھر میں چھ کروڑ کاپیاں فروخت ہوئیں۔

پاکستان میں پاپ موسیقی کی بانی کہلائی جانے والی گلوکارہ نا زیہ حسن کا یہ گیت آج بھی گنگایا جاتا ہے، انہیں پرائڈ آف پرفارمنس کا اعزاز ملا جبکہ بیسٹ فی میل پلے بیک سنگر ایوارڈ اور 15 گولڈ ڈسکس سمیت متعدد ایوارڈز سے بھی نوازا گیا۔

پاکستان کی پاپ کوئین کہلانے والی نازیہ نے ابتدائی تعلیم امریکن انٹرنیشنل یونیورسٹی اور لندن یونیورسٹی سے حاصل کی تھی، وہاقوام متحدہ کی ثقافتی سفیر بھی رہیں۔

گلوکارہ کی شادی مارچ 1995 کو کاروباری شخصیت مرزا اشتیاق بیگ سے ہوئی لیکن یہ شادی کامیاب نہ رہ سکی۔

13 اگست 2000 کو 35 سالہ نازیہ حسن اس دنیا سے رخصت ہوگئیں ،ان کی موت کی وجہ پھیپھڑوں کا کینسر بنا۔