پاکستانی اداکارہ مہوش حیات کی ہمشکل کے سوشل میڈیا پر خوب چرچے ہو رہے ہیں۔

معروف بالی ووڈ اداکارہ چترانگدا سنگھ کو سوشل میڈیا صارفین کی جانب سے مہوش حیات کی ہمشکل قرار دیا جارہا ہے۔

اپنے حالیہ انٹرویو میں اداکارہ چترانگدا سنگھ نے مہوش حیات کی ہمشکل قرار دیے جانے کے بارے میں بات کرتے ہوئے کہا کہ مجھے انسٹاگرام پر بہت سے لوگ ٹیگ کرکے کہتے ہیں کہ میں پاکستانی اداکارہ مہوش حیات کی ہمشکل ہوں۔

اداکارہ کا کہنا تھا کہ کچھ لوگ تو یہ سوال بھی کرتے ہیں کہ ہم جڑواں بہنیں تو نہیں ہیں۔

چترانگدا سنگھ نے اس بات سے اتفاق کیا کہ میں مہوش حیات سے کافی زیادہ مماثلت رکھتی ہوں اور اس حوالے سے میں صرف یہ کہنا چاہوں گی کہ ہم دونوں بہت دلکش خواتین ہیں۔

انہوں نے کہا کہ میں نے ابھی تک سیریز مس مارول میں مہوش حیات کا کام نہیں دیکھا لیکن وہ بہت خوبصورت اور پیاری ہیں۔

یاد رہے کہ اس سے قبل اداکار ہمایوں سعید اور اداکارہ مہوش حیات کا بولڈ فوٹو شوٹ سوشل میڈیا پر وائرل ہوگیا تھا۔

وائرل تصاویر میں اداکارہ مہوش حیات نے بلیک کلر کا مغربی لباس زیب تن کیا ہوا تھا جبکہ ہمایوں سعید سفید شرٹ کے ساتھ بلیک پینٹ اور کوٹ پہنے ہوئے تھے۔

گزشتہ دنوں سوشل میڈیا پر ایک ویڈیو بھی وائرل ہوگئی تھی جس میں دونوں اداکار اپنے مداحوں کے ساتھ اپنی فلم دیکھ رہے تھے۔

فلم کا گانا چلتے ہی دونوں اداکاروں نے ڈانس کرنا شروع کردیا جس سے وہاں بیٹھے تمام لوگ لطف اندوز ہوئے۔

ویڈیو میں اداکارہ مہوش حیات نے  سفید رنگ کی ساڑھی جبکہ اداکار ہمایوں سعید نے سفید رنگ کا کرتہ زیب تن کیا ہوا تھا۔

شیئر کی گئی ویڈیو کے کیپشن میں لکھا گیا تھا کہ ہمایوں سعید اور مہوش حیات امریکہ میں اپنی فلم ’لندن نہیں جاؤں گا‘ دیکھ رہے ہیں۔

واضح رہے کہ  اداکارہ مہوش حیات اور اداکار ہمایوں سعید اپنی فلم لندن نہیں جاؤں گا کی کامیابی پر سرخیوں میں ہیں جس نے نہ صرف پاکستان بلکہ بیرون ملک بھی شاندار کارکردگی کا مظاہرہ کیا ہے۔